IZINGQAPHELI kwezemidlalo kanye nabalandeli bamaqembu adlala unobhutshuzwayo esigabeni seDStv Premiership sebeqalile ukuqagela ukuthi yikuphi okulindelekile emidlalweni yomqhudelwano weMTN 8, edlalwa imilenze emibili.
Lokhu kukhuluma kulandela ukuthi ngoMsombuluko iPremier Soccer League (PSL) iqinisekise izinsuku, izikhathi kanye nezinkundla lemidlalo ezodlelelwa kuzo kusukela ngoMgqibelo ozayo, Okthoba 1 nangeSonto, Okthoba 2.
Okuphawulekayo nokwenza izingqapheli ziphawule ngalemidlalo ukuthi indlela amaqembu aqhathwe ngayo kuma-semifayineli kukhombisa ngokusobala ukuthi kuyolamula ukukhala kwendweba yokuqeda umdlalo.
IMamelodi Sundowns evikela isicoco samqhudelwano ohambisana nesidlaliso esithi, “Wafa Wafa” kulindeleke ukuthi itholane phezulu ne-Orlando Pirates esawuwine izikhathi ezintathu, kusukela ngo-2008. Umlenze wokuqala kulindeleke ukuthi ube se-Orlando Stadium, ngoMgqibelo, Okthoba 1, ngo-3.30 ntambama.
IKaizer Chiefs enqobe lomqhudelwano ngo-2008 nangonyaka ka-2014 kulindeleke ukuthi idudulane naMaZulu FC ngeSonto, Okthoba 2, eFNB Stadium nawo lomdlalo uzoqala ngo-3.30 ntambama.
Emlenzeni wesibili walamaqembu kubhekeke ukuthi ngoMgqibelo, Okthoba 22 kube uwafa wafa phakathi kweMamelodi Sundowns ne-Orlando Pirates, ePeter Mokaba Stadium, ngo-3.30 nokuwumdlalo ozocacisa ukuthi ngakube iSundowns iyaqhubeka nezinhlelo zokuvikela indebe noma iPirates ifuna ukubuyisa ithemba kubalandeli ngokuwina lendebe.
Akwaziwa ukuthi izozala nkomoni phakathi kwaMaZulu FC neKaizer Chiefs emlenzeni wesibili ozokuba ngeSonto, Okthoba 23, eMoses Mabhida Stadium, eThekwini, ngo-3.30 ntambama.
Nawo lomdlalo ubhekwe ngabomvu ikakhululazi abalandeli beMpofana ababhekene nesimiso sezindebe, nalo futhi uSuthu lubheke ukuthi lubuyise ukuzethemba nenqubekela phambili ngokuthi ube ngompetha balomqhudelwano.
Umlando weMTN8 kusukela ngo-2008 kuze kube yimanje uhamba kanje, ngo-2008 iChiefs yabangompetha, ngo-2009 kwaba yiGolden Arrows, ngo-2010-2011 kube yi-Orlando Pirates, ngo-2012 kwaba yiMoroka Swallows, ngo-2013 kube yiPlatinum Stars, ngo-2014 kube yiKaizer Chiefs.
Ngonyaka ka-2015 kwaba yi-Ajax Cape Town, ngo-2016 kube yiBidvest Wits, ngo-2017 kwaba yiSuperSport United, 2018 kube yiCape Town City, ngo-2019 kuphinde kwaba yiSuperSport United, ngo-2020 kube yi-Orlando Pirates, kwazothi ngo-2021 kwaba yiMamelodi Sundowns.
Amathikithi alomqhudelwano aseyatholakala ezikhungweni ezidayisa amathikithi ezweni lonke , kwabadala abiza uR80 bese kuthi kwabaneminyaka engaphancsi kuka-12 ubudala kube uR20.
Ngaphandle kwalomqhudelwano kulindeleke ukuthi kushikishe ufudu ezinkundleni ezahlukene kugadulisana amaqembu eDStv Premiership emidlalweni yamaphuzu. NgoLwesibili luka-Okthoba 4, kuzobe kududulana iSekhukhune United ne-Orlando Pirates ePeter Mokaba Stadium, ePolokwane, ngo-5 ntambama.
Ngosuku olufanayo ngo-7.30 ebusuku Stellenbosch sizokwamukela iMaritzburg United eDanie Craven Stadium, eStellenbosch. Akwaziwa mbhantshi kujiya emdlalweni ozokuba phakathi kweGolden Arrows neCape Town City, ePrincess Magogo Stadium, KwaMashu, ngo-7.30 ebusuku ngalo uLwesibili.
Omunye futhi umdlalo ngozokuba phakathi kweTS Galaxy neMarumo Gallants eMbombela Stadium, eNelspruit, 7.30 ebusuku. SuperSport Utd izobe ingosokhaya ngesikhathi ibhekene neRoyal AM eLucas Masterpieces Moripe Stadium, ePitoli ngo-7.30 ebusuku. Nayo lemidlalo izoba ngoLwesibili, Okthoba 4.
Ngakusasa ngoLwesithathu, Okthoba 5, kuzodilika umthangala emdlalweni womkhaya ozokuba phakathi kwaMaZulu neRichards Bay, eMoses Mabhida Stadium, eThekwini, ngo-5 ntambama. Kuzoqhuma nhlamvana ezinye ziyofekela komunye umdlalo womkhaya lapho kuzobe kugijimisama iSwallows neKaizer Chiefs ePeter Mokaba Stadium, ePolokwane, ngo-7.30 ebusuku.
