KULINDELEKE ukuthi ukucokama kwezinga lemidlalo esilibone ngempelasonto kuqhubeke kusukela namuhla njengoba amanye amaqembu asazikhotha amanxeba ngesibhaxu esinzima asitholile.
IRoyal AM ebhaxabulwe yiStellenbosch FC ngo-3-1 emdlalweni weDStv Premiership obuseDanie Craven Stadium ngoMgqibelo kulindeleke ukuthi idudulane ne-Orlando Pirates nayo esazikhotha amanxeka ngemuva kokushaywa ngo-1-0 yiChippa United ngempelasonto emdlalweni obuse-Orlando Stadium. Umdlalo weThwihli Thwahla nezikaMagebula uzokuba seMoses Mabhida namhlanje ngo-7.30 ebusuku.
AmaZulu FC ehlula iCape Town City ngo 2-1 emdlalweni weDStv Premiership obuseMoses Mabhida Stadium, eThekwini ngoMgqibelo ebusuku kulindeleke ukuthi avakashele iSwallows eDobsonville Stadium, eSoweto, ngoLwesihlanu, Agasti 19. AmaSwayiswayi azodlala lomdlalo nje ngoLwesihlanu olwedlule adlale ngokulingana neMaritzburg United, eHarry Gwala Stadium, eMgungundlovu.
IMamelodi Sundowns ibukise ngeKaizer Chiefs ngesikhathi iyilobola ngo-4-0 eLoftus Versfeld Stadium ngoMgqibelo ntambama, kulindeleke ukuthi ngoMgqibelo, Agasti 20 itholane phezulu neSekhukhune United, ePeter Mokaba Stadium, ePolokwane ngo-3 ntambama.
I-TS Galaxy nayo eqhubekile nokwenza kahle njengoba iguqise iSuperSport United ngo 2-0 eMbombela Stadium ngeSonto kusihlwa kulindeke ukuthi idlale neGolden Arrows ngoMgqibelo ePrincess Magogo Stadium, KwaMashu. Lomdlalo uzokuba ngo-3 ntambama.
Omakotin bePSL, i-Richards Bay FC eqhubekile nokuwuqala kahle umkhankaso we-DStv Premiership ka-2022/23, ngemuva kokunqoba iSekhukhune United ngo 1-0 ngoMgqibelo ebusuku eKing Zwelithini Stadium kulindeleke ukuthi idudulane neKaizer Chiefs ngoMgqibelo, eMoses Mabhida Stadium, ngo-8 ebusuku. Lona kuzobe kungumdlalo wesibili weChiefs iwudlala eThekwini kulandela ewudlale neRoyal AM lapho ibingelelwe ngo-1-0, eChatsworth Stadium.
IMaritzburg United edlale ngokulingana neSwallows, eHarry Gwala Stadium, eMgungundlovu ngoLwesihlanu olwedlule kusihlwa, kushaye isikhathi sokushicilela izolo ngoLwesibili ungakatholakali umphumela womdlalo wayo ne-Cape Town City obuse-Athlone Stadium, eKapa. Lomdlalo uqale ngo-7.30 ebusuku.
Imidlalo yeDStv Premiership:
Namuhla: Royal AM vs Orlando Pirates (Moses Mabhida Stadium, eThekwini, 19.30)
NgoLwesihlanu: Swallows vs AmaZulu FC (Dobsonville Stadium, Soweto, eGoli, 19.30)
NgoMgqibelo: Sekhukhune United vs Mamelodi Sundows (Peter Mokaba Stadium, Polokwane, 15.00); Golden Arrows vs TS Galaxy (Princess Magogo Stadium, KwaMashu, 15.00);Cape Town City vs Stellenbosch (Cape Town Stadium, Cape Town), 17.30); Maritzburg United vs Chippa United (Harry Gwala Stadium, eMgungundlovu, 20.00);Richaerds Bay vs Kaizer Chiefs (Moses Mabhida Stadium, eThekwini, 20.00)
NgeSonto: Royal AM vs Marumo Gallants FC, Chatsworth Stadium, Chatsworth, 15.00)
