KULINDELEKE ukuthi kushikishe ufudu emidlalweni yamaphuzu yeDStv Premeirship ezokuba ngalempelasonto, Septhemba 18-19 ezinkundleni ezahlukene. Lemidlalo ilandela eyakamuva lapho kubonakala khona abadlali bekhombisa ukudlala ngokuzikhandla.
I-Richards Bay esanda kushaya ngo 1-0 iRoyal AM, emdlalweni weDStv Premiership obuseChatsworth Stadium ngoLwesibili olwedlule kusihlwa kulindeleke ukuthi idudulane neTS Galaxy ngeSonto, eKing Zwelithini Stadium, eMlazi, ngo-5.30 ntambama.
IGalaxy izodlala lomdlalo nje isazikhotha amanxeba ngemuva kokushaywa yi-Orlando Pirates ngo-2-0 emdlalweni wamaphuzu obus-Orlando Stadium, ngoMgqibelo kusihlwa.
IChippa United ehlule AmaZulu FC ngo 2-1 emdlalweni weDStv Premiership obuseMoses Mabhida Stadium, eThekwini ngoMgqibelo ntambama kulindeleke ukuthi ngoMgqibelo yamukele iMarumo Gallants, umdlalo uzokuba seNelson Mandela Bay Stadium, ePort Elizabeth, ngo-3 ntambama.
Usuthu lona oluhlezi endaweni yesine esicongweni kulindeleke ukuthi lubhekane neMamelodi Sundowns ekuhambeni ngeSonto, Septhemba 18, eLoftus Versfeld Stadium, ePitoli, ngo-3 ntambama.
IStellenbosch esehlule iSwallows ngo 2-1 eTuks Stadium, ePitoli ngoMgqibelo ntambama kulindeleke ukuthi sidudulane neSekhukhune United ePeter Mokaba Stadium, ePolokwane, ngo-5.30 ngoMgqibelo, Septhemba 17.
Kulindeleke ukuthi kube ngongaphansi nongaphezulu emdlalweni ofaniswa nowafa wafa ozokuba phakathi kweKaizer Chiefs neSuperSport United, eFNB Stadium, eGoli, ngoMgqibelo ngo-8 ebusuku.
Imidlalo yeDStv Premiership kulempelasonto:
NgoMgqibelo: Chippa Unite vs Marumo Gallants FC (Nelson Mandela Bay Stadium, Port Elizabeth, 15:00); Golden Arrows vs Swallows ( Princess Magogo Stadium, Durban, 15:99); Sekhukhune United vs Stellenbosch (Peter Mokaba Stadium, Polokwane, 17:30); Kaizer Chiefs vs SuperSport Utd (FNB Stadium, Johannesburg, 20:00)
NgeSonto: Mamelodi Sundowns vs AmaZulu (Loftus Versfeld Stadium, Pretoria, 15:00); Richards Bay vs TS Galaxy (King Goodwill Zwelithini Stadium, Durban, 17:30)
