KUQHUME imikikizo ngoMsombuluko nasezinkundleni zokuxhumana ngemuva kwesimemezelo esithi uNkk Nomusa Dube-Ncube ungowesifazane wokuqala kulesi sifundazwe ukuqokelwa esikhundleni sokuba nguNdunankulu.
UNkk Dube-Ncube ongowokuzalwa elokishini KwaMashu enyakatho yeTheku, wethulwe ubuholi be-ANC ngoMsombuluko esithangamini nabezindaba. Lokhu kwenzeke ngemuva kokuba kwisimemo se-ANC sabezindaba ngeSonto ibithe izomemezela ozovala isikhala sikaNdunankulu ngoMsombuluko esivuleke ngemuva kokusula kukaMnuz Sihle Zikalala kulesi sikhundla okwenzeke ngoLwesihlanu olwedlule.
Ngemuva kwezingxoxo ekomkhulu leqembu ngoMgqibelo kuqale izinkulumo zokuthi uqokwe yisigungu. Kubo bonke ondunankulu abayisishiyagalombili bakulesi sifundazwe kusukela ngo-1994 akekho noyedwa kubo obengumuntu wesifazane.
Kulindeleke ukuthi kulandelwe uhlelo lokuthi unobhala we-ANC azise uSomlomo uNontembeko Boyce noma amcele ukuthi abize isipesheli ngoLwesine ukuze amalungu esiShayamthetho azomvotela.
Ngokomlando omfushane uNkk Dube-Ncube uzalelwe wakhulela KwaMashu enyakatho yeTheku, ukhulele ezinhlakeni ze-ANC kanti useke waphatha izikhundla ezahlukene eziphezulu enhlanganweni okubalwa esephini likaNobhala nelikaMgcinimafa agcine ebambe kuzo emasontweni amabili edlule engqungqutheleni.
UneNational Diploma yePublic Management, Management and Leadership, Training and Development ayithola eDurban University of Technology kanye neMasters kwiPublic Administration ayithole eNyuvesi yaKwaZulu-Natal.
Isikhundla sakhe sokuqala esiphezulu kuhulumeni kube esokuba yiMeya yoMkhandlu Wasekhaya waseNyakatho Ephakathi ngaphambi kokuba uMkhandlu waseThekwini uhlanganiswe nabanye abaningi abakhe uMasipala weTheku aqokwa kuwo njengoSomlomo ngo-2000.
