Kubhekeke iqophelo eliphezulu embukisweni wemfashini obaminyaka yonke eThekwini.
SEKUNTWELA ezansi kombukiso wemfashini obaminyaka yonke eThekwini, iDurban Fashion Fair (DFF) 2021 ozoqala ngomhlaka 15 Disemba kuyakumhlaka 17 Disemba eDurban Exhibition Centre, eThekwini.
UNonku Mthembu oyiPhini leNhloko yezokuthuthukiswa kwamabhizinisi amancane naphakathi nendawo ngaphansi koPhiko lokweSekwa kwamaBhizinisi, ezokuVakasha, iziMakethe nezoLimo, uthe: “I-DFF iyinkundla enhle kakhulu yokuba abasiki bengqephu nabanye abasembonini yemfashini bakhombise ngemisebenzi yabo kulo mcimbi oheha ababambiqhaza bemboni nabathengi.” UMthembu uthe iningi labasiki bengqephu asebeke babamba iqhaza kulo mbukiso bathole ukukhishelwa eshashalazini, baqeqeshwa baphinde belulekwa kanti kuyimanje sebezakhele amagama embonini. Ukulungiselela lo mcimbi wemfashini, iDolobha liphothule umkhankaso walo wokuthungatha amamodeli ovalwe ehholo lophakathi KwaMashu kwaF ngomhla ka-6 Novemba. Lo mkhankaso wokuvumbulula ithalente ububanjelwe ezifundeni ezinhlanu kanti uhehe cishe abafisa ukumodela abangu-1000. UMthembu uthe isiyaphothulwa imiphumela kanti abaphumelele bazoba yingxenye yohlelo lweDolobha lokuthuthukisa ezemfashini kanye neDFF. “Inhloso yethu wukuthuthukisa nokuhlinzeka abafisa ukumodela abangenamava ngomnyango wokungena kule mboni. Abakhethiwe bazoqeqeshelwa ukumodela nokusebenza embonini yonke,” uphethe kanje.
