AMAPHOYISA aseMlazi eningizimu yeTheku akhuthaze abafundi ngokubaluleka kokubikwa kobugengu ezindaweni abahlala kuzo, athi ukungabikwa kwakho yikhona okuhlela ekutheni linyuke mawala izinga lobugebengu kuleli lokishi..
Lena yengxenye yomyalezo obuhanjiswe amaphoyisa eMlazi, kubafundi basekoleni samabanga aphezulu, i-Ogwini Comprehensive Technical High ngenkathi eqhuba uhlelo lwawo lokuqinisa ezokuphepha ezikoleni zamabanga aphezulu zakuleli lokishi.
Lo mkhankaso uthinta nasekuphathweni kwezikhali eziyingozi ezikoleni, ukukhulelwa okungahlelelwe, ukuhlukumezana kwabafundi, ukuhlukunyezwa kwezingane, ukunukubeza ngokocansi kanye nokudlwengula.
Amaphoyisa awuqhuba ngokubambisana noMnyango wokuPhepha nokuXhumana koMphakathi kanye neLife Line Durban. Umkhankaso uphinde usetshenziselwe ukuhlinzeka abafundi ngolwazi olubalulekile ngokungena embuthweni wamaphoyisa.
USergent Sifiso Gumede weSocial Crime Prevention Unit, uthe ukuthengwa kwempahla eyebiwe kukhuthaza izigebengu ukuba zenze ubugebengu ngoba zithola imali esheshayo. Uthe abafundi kumele bebe nesiqiniseko sokuthi impahla abayithengayo ayebiwe.
“Uma uthenga impahla eyebiwe uzibeka engozini yokuboshwa ngoba uma siyithola kuwe ekubeni imataniswa nesigameko sobugebengu, lelo cala lithwalwa uwena,” kusho uGumede othe kungenzeka nokuthi impahla eyebiwe ithinteka ecaleni lokubulala.
Uphinde waxwayisa abafundi ngomthelela wokuphatha izikhali eziyingozi, wathi bangagcine bebulalana emagcekeni esikole. Uthe abafundi kumele bengasondeli nakwizibhamu ngisho ngabe zisemthethweni ngoba babeka bona nabasondele engozini.
UNks Nwabisa Mangciva osebenza eMnyangweni wokuPhepha nokuXhumana koMphakathi, uchazele abafundi ngezindlela ezehlukene zokubika uma kukhona obahlukumezayo. Uthe kumele begweme ukufela ngaphakathi ngoba kubobungozi bokuthi umuntu agcine ezibulala.
UNks Thuli Taylor onguSonhlalakahla kwiLife Line Durban, unxuse abafundi ukuba begxile ezincwadini zabo esikhundleni sokwenza izinto ezingalungile. Uthe abafundi bamantombazane kumele begweme ukujola namadoda amadala.
“Kuyicala ukuthi umuntu omdala ejole nengane encane, ngisho ngabe bavumelene. Kumele beboshwe bonke ngoba kubeka abafundi engozini yokukhulelwa nokwesuleleka ngezifo ezithelelana ngokocansi,” kusho uTaylor.
UWarrant Officer Sithembile Shezi yena ukhuthaze abafundi ukuba benze abasuke bethunywe ukuba beyokwenza eskoleni. Uthe kumele begweme izixuku ezihlohlana ngokwenza izinto ezingalungile ngoba bazozisola emva kwesikhathi bengasekho abangani.
UKatpeni Jwili uhlebele abafundi ukuthi amaphoyisa ngeke eyeke ukuhlola konke okwenzeka ezikoleni, okusho ukuthi bonke abephula umthetho bazozibeka emathubeni okuboshwa ngoba amaphoyisa ngeke ememezele uma esezohlola isimo.
