NJENGOBA sekubalwa izinsuku kuqale ingqungquthela ye-African National Congress (ANC) esifundazweni saKwaZulu-Natal, sekuqalile ukukhuluma ukuthi ubani ongakwazi ukubumba lenhlangano kulesi sifundazwe.
Amanye amagatsha e-ANC athi akholelwa ukuthi uNkk Nomusa Dube-Ncube ongowokuzalwa elokishini KwaMashu, enyakatho yeTheku amava akhe wokusebenzela umphakathi angabanamandla ekutheni abumbe i-ANC. Ngokusho kwabalandeli balenhlangano abasemagatsheni abukeka emthwele ngeqoma uNkk Dube-Ncube ubuhlakani nokuzibeka phansi nokungathathi ngamawala yikhona okwenza bambone njengosifanele isikhundla sokuhola i-ANC kulesi sifundazwe nokuzobe kungokokuqala ngqa uma ephumelela lenhlangano iholwe ngumuntu wesifazane ezingeni lesifundazwe eKZN.
Ingqungquthela ye-ANC kulindeleke ukuthi ihlale ngoLwesihlanu, Julayi 22 iphele ngeSonto, Julayi 24, e-Olive Convention Centre, eThekwini. Ngokohlu oluzungeza ezinkundleni zokuxhumana kubukeka kuzoba umjaho onzima lo njengona kukhona ababona uMnuz Sihle Zikalala aqhubeke nokuba nguSihlalo, isekela lakhe kube uMnuz Kwazi Mshengu, uNobhala kube uMdumiseni Ntuli, iPhini lakhe kube uNks Nontembeko Boyce bese kuthi uMnuz Jomo Sibiya abenguMgcinimafa.
Abanye babona uMnuz Siboniso Duma ekufanele ukuba uSihlalo, iPhini kube uDkt. Ntuthuko Mahlaba, uMnuz Bheki Mtolo abe nguNobhala, iPhini larklhe kube uMnuz Sipho Hlomuka bese kuthi uMgcinimafa kube uNkk Zandile Gumede.
Kukhona ababona uMnuz Sandile Zungu njengoSihlalo, uNkk Nomagugu Simelane-Zulu njengePhini likaSihlalo, uMnuz Super Zuma njengoNobhala, iPhini lakhe kube uNkk Bongi Sithole-Moloi bese ksuthi uNkk Zandile Gumede abenguMgcinimafa.
“Abaholi bethu sebenethezeke kakhulu ngenkathi singenazo izidingongqangi ezifana namanzi nogesi” lawa ngamazwi eNgonyamakazi enesibindi yaKwaZulu-Natal uComrade Nomusa Dube-Ncube……uqhuba athi. ..”Asiguqule Isimo Esikhona kubantu bakithi!”
Umuntu akakwazi ukuzibamba kodwa ukhumbule ukuthi nango-1956 kwathatha abesifazane abasukuma baphonsela inselelo futhi bashintsha isimo esasikhona! UCde Nomusa Dube-Ncube ngempela unguLialian Ngoyi wezikhathi zethu futhi sikulungele ukuholwa ngumuntu onoMoya Wezinguquko. Kuye sibona uMoya ongafi kaHelen Joseph.
Ngikholwa wukuthi sekuyisikhathi sokuthi sivume ukuHolwa ngabantu abakwaziyo ukuthi kusho ukuthini ukunakekela abanye, yibona kuphela abakwazi Ukusinakekela kanye Nemvelo ezibelethweni zabo izinyanga eziyisishiyagalolunye.
Ukuthambekela kokhokho ngeke kusisize thina kanye naboHlanga ngalesi sikhathi! Masisekele lolu chungechunge kanye noMholi onohlonze ukuze siguqule isimo esikhona” kusho uThulani Gamede owaziwa njengomunye wabalandeli bokuqina bakaMnuz Jacob Zuma naye (uMnuz Gamede) abamfuna esesigungwini sesifundazwe.
“Bakwethu akumele sibakhohlwe abaholi bethu, kumele ngaso sonke isikhathi siye kubo siyobonisana nabo, bayimithombo yethu yobuhlakani futhi bebengakwazi ukusikhombisa indlela yokuyisa phambili umnyakazo wethu ngoba ubuhlakani nolwazi abanalo kuzosisiza kakhulu,”kusho uNkk Dube-Ncube.
Engqungqutheleni ye-ANC yesifundazwe ezayo, uxwayise amalungu ukuthi agweme izingxabano ezithinta imizwa nemincintiswano yobuntu efuna ukuphakamisa izimfuno zabo ngaphezu kwezidingo zabantu besifundazwe. Unxuse amalungu ukuthi aqinisekise ukuthi iqembu lidlala indima yalo njengokugqugquzela uguquko esifundazweni nasezweni.
