UKUNTULEKA kwemisebenzi kwizifundiswa zakuleli kwenze ukuthi ibandla iKingdom Life Ministries International (KLMI) libe nenkonzo ekhethekile yokukhulekela izifundiswa ezifunde zagogoda emikhakheni ehlukene nezikhonza kuleli bandla eliholwa uMphostoli Lungi M ngeSonto.
Inkonzo yokukhulekelwa kwezifundiswa ibibanjelwe esakhiweni saleli bandla, ekhoneni lemigwaqo uStalwart Simelane kanye noWest Street, eThekwini. Ngokuhlelo lwaleli bandla njalo kuba nezikhathi zokukhulekela izimo ezahlukene.
Ngaphandle kokukhulekela ukuntuleka kwemisebenzi, uMphostoli Lungi M ubebonga uMdali ukuthi ebandleni kubekhona amalungu azikhandlayo emkhakheni wezemfundo nokuyinto ahlale eyigqugquzela kumalungu aleli bandla.
