KUBHEKEKE ukuthi owesifazane oselahlekelwe yithemba aphume etsheliwe ukuthi usukuma kanjani emkhulekweni okulindeleke ukuthi ubeyindumezulu ozokuba se-Anderson Park, ePinetown , entshonalanga yeTheku, ngoMgqibelo kusukela ngo-10 ekuseni.
Lomkhuleko ohlelwe nguDkt. Nomusa Madlala odume ngelikaMama Siphithiphithi ngokubambisana nenhlangano Isakha Isizwe Ngomuntu Wesifazane isiqubulo enesiqubulo esithi, “Ayiyintsha Lento, Kosala Kwazeka”, uxhaswe uMasipala weTheku kanye noMnyango wezokuPhepha ezingeni lesifundazwe. Phakathi kwabesifazane abayisibonelo esihle emphakathini nasemsebenzini kaNkulunkulu abazobe beyizikhulumi zosuku, kubalwa uNkk K Mbongwa uMqondisi Jikelele Ophikweni lwezokuphepha koMphakathi eMnyangweni wezokuPhepha ezingeni lesifundazwe, kwingxenye yesifunda saseThekwini benoNkk Lindiwe Mthembu uSihlalo woPhiko lwabesifazane be-ANC kwisifunda saseThekwini, Kosaziwayo abayisibonelo esihle emsebenzini weNkosi abazobe bekhona kubalwa uMphostoli JC Nyandeni, uLady Bishop BD Zikhali, uMphostoli F Ndaba, uDkt. T Ngonela kanye noDkt. MT Sithole. Ngasohlangothini lwendumiso yomculo kuzobe kukhona uLondeka Siphe Nxumalo odume ngengoma ethi “Ngenzelwe Isimanga, ngiyayibonga iNkosi” , uXoli Mjwara kanye noMamcy Mjwara. I-Paki, i-Anderson ePinetown ingasenxanxatheleni yezitolo, iPinetown Mall, kanti isiqubulo sithi, “Rise and Thresh, O Daughter of Zion”, sisuselwe kuMika 4:13. Ukuthola eminye imininingwane ungashayela ku-0733772856/0734504261. Ephawula ngalomkhuleko uDkt. Madlala uthe, akangabazi ukuthi abazobe bewuhambele bazophuma bedelile futhi bevuleke namehlo ngezinselelo ababhekene nazo bengabantu besifazane.
