INYANGA yabantu besifazane egujwa umhlaba wonke iphothulwe ngendumezulu yomcimbi wokukhumbula iNdlovukazi uNandi, izihambeli zomcimbi aziwuvali umlomo ngobuciko, umculo, umdanso, nezinkondlo ebezichaza umlando nendima eyadlalwa uNandi waseLangeni emlandweni wesizwe sakwaZulu.
Umcimbi iNandi the Musical ebise-Inkosi Albert Luthuli International Convention Centre (ICC), uhambisana nomdlalo weshashalazi ochaza kabanzi ngezimo indlovukazi eyadlula kuzo. Ugujwa minyaka yonke, waqala ngo-2018 njengendlela yokufundisa abesimame ngomlando wendlovukazi. Lo mdlalo usubukiswe kwizifundazwe ezehlukene kuleli, iseNew Orleans, New York, kanye naseChigaso, zonke lezi zindawo zikwelase-USA. Nakuba abadidiyeli bomdlalo nabalingisi benesifiso sokuthi uphinde ubuyele eMelika, kodwa okuningi kuncike ekuxegisweni kwemigomo kathaqa nobungozi beCovid-19.
UMnuz Edmund Mhlongo onguMbhali womndalo, uthe wahlabeka umxhwele ngomlando wendlovukazi ngenkathi esebenza kumdlalo iMadam President elandelela umlando wabantu besifazane abaqopha umlando e-Africa. Wabe esenquma ukusungula umdlalo ozofundisa ngalo lonke ulwazi aluthola. “Ngathola ukuthi usohlwini lwezindlovukazi ezingu-10 ezihlonishwa kakhulu e-Afrika, usohlwini lwezingu-100 umhlaba wonke. Ngikholwa ukuthi kuningi abesimame abangakufuna uma belandela umlando wakhe. Wabhekana nezivunguvungu ezinzima kodwa akaze adikibale,” kusho uMhlongo.
Uthe kungenxa yemfundiso yakhe eyenza ukuthi iNkosi uShaka igcine isibumba isizwe sakwaZulu. Uthe ngendlela indlovukazi ehlonishwa ngayo eMelika, abazali baqamba izingane zabo ngoNandi njengendlela yokumhlonipha. Uthe kuyadumaza ukuthi eNingizimu Africa kukhona abangayazi indlovukazi. ULindokuhle Ziqubu obelingisa kulo mdlalo, uthe ukuba ingxenye yalo mdlalo kumfundise kabanzi ngendlela abantu abamnyama ababephila ngayo enkathini eyedlule. Uthe unamahloni ngokuthi ebeqala ngqa ukuzwa ngezinto eziningi zesintu nkulo mdlalo.
“Sesigiijimela imidanso nezinto ezenziwa manje, sesizikhohliwe ukuthi asizazi izinto zesintu. Kuyihlazo lokhu. Kuningi engikufunde emdlalweni, ngithemba ukuthi kuningi nengisazokufunda ngoba ukhuluma ngomlando wabantu abamnyama,” kusho uZiqubu. UKhansela Mxolisi Kaunda oyiMeya yeTheku, uthe umlando wendlovukazi ubalulekile ngoba utshengisa ukubaluleka kobuholi bomuntu wesifazane. Uthe indlovukazi yatshengisa ukuthi kukhulu okungafezeka uma kunikwa abesifazane ithuba lokuhola imiphakathi.
“Sithanda ukudlulisa ukubona okukhulu kuMhlongo nethimba asebenzisana nalo ngokusifundisa nokusikhumbuza ukuthi kubaluleke kangakanani ukuhlonishwa kwamagalelo abaholi besifazane. Okwenzekile kuzoba isifundo kwabaningi. Sinethulela isigqoko,” kusho uKaunda.
