BEKUDLISA imvunulo neminye imisiko etshengisa ukwehlukana kwamasiko nosikompilo yasemazweni ase-Afrika ngenkathi abafundi baseMbizweni High, esigcemeni sakwa-F eMlazi, bebungaza inyanga eqhakambisa ngobugugu be-Afrika ebungazwa njalo ngoMeyi.
Abafundi banandise ngokuhaya izinkondlo, basina, abanye bahlabelela ngenkathi bebungaza usuku lwamaGugu e-Afrika olwaqokwa ngoMeyi 25, 1963. Lwaqokwa abaholi bamazwe ase-Afrika ngenkathi kuqokwa okokuqala ubuholi beNhlangano yoBumbano lwamazwe ase-Afrika, i-Organisation of African Unity (OAU) manje esiyaziwa ngokuthi i-African Union (AU).
