Kukhunjuzwe abafundi baseMpushini Primary, eMbumbulu, ngokubaluleka kokuhlanjwa kwezandla
NJENGOBA umhlaba wonke ububungaza usuku lokukhuthaza ukulwisana nokusabalala kwamagciwane ngokuhlamba izandla, i-Uniliver ngokubambisana noMnyango weMfundo eyiSisekelo, bavakashele abafundi baseMphushini Primary, eseMbumbulu, ukuyobachazela kabanzi ngalokhu.
Ukukhumbuza abafundi ngokubaluleka kokuhlamba izandla kuhambisana nezinhlelo zomnyango zokuthuthukisa ezenhlanzeko nokuphepha kwabafundi ezikoleni. Kwenziwe ngaphansi kwesiqubulo esithi Unite for Universal Hand Hygiene. Abafundi baphinde bagqugquzelwa ukuba belahle imfucuza ngendlela efanele. UNgqongqoshe womnyango uNks Angie Motshekga, uthe umnyango ukushayela ihlombe ukuthi izinhlaka ezehlukene zizibophezele ekubambisaneni nawo ukuqinisekisa ukuthi konke kuhamba kahle ezikoleni. Wengeze ngokuthi umnyango ukuthakasele ukubungaza lolu suku KwaZulu-Natal ngenxa yezimo isifundazwe esisanda kwedlula kuzo.
“Lesi sifundazwe sidinga ukwesekwa. Ukubambisana nezinhlaka ezehlukene nezinhlangano zomphakathi kwenza kufezeke kalula esikuhlosile. Kuyasithokozisa ukubona izinkampani ezifana ne-Uniliver ziphuma ziyobamba iqhaza emphakathini, singakuthokozela ukubona nezinye zenza okufanayo,” kusho uMotshekga. UMnuz Justin Apsey oyiSkhulu esiPhezulu kwi-Uniliver, uthembise ukuthi le nkampani izoqhubeka nokubambisana nomnyango kwizinhlelo ezehlukene ngoba ikholwa ukuthi ikusasa lezwe lilele ekwesekweni kwabafundi, bethole konke abakudingayo ezikoleni. Uthe bakholelwa kakhulu kwinhlanzeko yezingane.
“Sibungaze lolu suku ngokusebenzisa omunye wemikhiqizo yethu iLifebouy okuyinsipho ethandwa kakhulu izingane, nezivikela kumagciwane amaningi. Sesikhiqize le nsipho iminyaka engaphezu kwengu-140. Sikhuthaza abafundi ukuba bekujwayele ukuhlamba izandla ngamanzi nensipho ngoba kuphephisa izimpilo zabo,” kusho u-Aspey. Usaziwayo uDj Zinhle oyinxusa leLifebouy, uthe kusemqoka ukuthi kube nendlela ekhethekile yokwedlulisa ulwazi ezinganeni ukuze zingeke zibone engathi kuyimpoqo ezifuke zifundiswa khona kodwa kube into ezikujabulelayo ukuyenza ukuze zingeke zigcine ngokuhlamba izandla uma kubungazwa lolu suku kuphela.
