AYAPHELA amaphupho ngoMgqibelo, Okthoba 16 ngesicoco sikaMiss SA 2021okulindeleke ukuthi umcimbi wamanqamu walomqhudelwano usakazwe bukhoma eGrand West Arena, eKapa.
Phakathi kwezintokazi eking-10 ezifinyelele kowandulela owamanqamu okulindeleke ukuthi kuphume kuzo ozokuba nguMiss SA 2021 kubalwa uBianca Bezuidenhout, uCatherine Groenewald, uCheneil Hartzenberg, uJeanni Mulder, uKaylan Matthews, uKgothatso Dithebe, u-Lalela Mswane, uMoratwe Masima, uTiffany Francis noZimi Mabunzi. Eminyakeni emibili ilandelana, lo mqhudelwano ubanjwa ngenkulu impumelelo, eKapa, uzobe uboniswa bukhoma kuM-Net (DStv channel 101) nakuMzansi Magic (DStv channel 161) ngo-5 ntambama, uphinde usakazwe bukhoma ku- Uhlelo lwami lwe-DStv. Abangenele lo mncintiswano bamele izifundazwe ezine zakuleli okuyisifundazwe saseGauteng yona ehlome ngezintokazi ezine (eyodwa isuka eTshwane), ilandelwe iWestern Cape ngezintathu, i-Eastern Cape ihlome ngezimbili, isifundazwe saKwa-Zulu/ Natal simelwe yintokazi eyodwa. Abathathu abaphumelele, okuyi-Top 3 bazoqhubekela phambili bayomela izwe emincintiswaneni emithathu ehlonishwayo emhlabeni: uMiss Universe, uMiss World, kanye noMiss Supranational. Ngesikhathi ziphawula ngokudlulela kowamanqamu lezi zintokazi zibeke kanje: UZimi Mabunzi, waseQonce (eKing William s Town) ophinde wahlabana ngokuba ngokunqoba i-People s vote, ubeke kanje, Kukhona ividiyo emfushane yentombazanyana, engifisela okuhle ohambweni lwami lukaMiss South Africa. Bengingayazi le ntombazanyana ngaphambi kokuba unina athole inombolo yami bese eyithumela kimi.
Kubonakala sengathi umthanda ngempela uMiss South Africa futhi wayejabule kakhulu ukuzwa ukuthi othile wasedolobheni lakubo ubekwiTop 30. Kuyathokozisa kakhulu ukwazi ukuthi ukuzinikela nokukholwa kwami sekube nomthelela komunye umuntu wesifazane osemusha. UJeanni Mulder waseKapa uthe Ngifuna ukukhombisa abantu baseNingizimu Afrika izwi lami, indaba yami, nokuthi yini engiyimele. Ngikulungele ukukhuluma ngenkinga enkulu iNingizimu Afrika ebhekene nayo futhi uMiss South Africa uzonginika ithuba lokuqalisa ushintsho. Ngakho-ke landela uhambo lwami ukubona ukuthi lokho kuzoba yini! UBianca Bezuidenhout, waseKapa, uthe lo mncintiswano usho ukuthini kuye: UMiss South Africa akawona umcimbi owenziwa kanye nje; sonke siyingxenye ekubambeni iqhaza elinamandla lapho singakugqugquzela, sifundise futhi sikusebenzise njengendlela yokwethula ushintsho kwezenhlalo oludingeka kakhulu.
UCheneil Hartzenberg waseGoli udalule lokho afuna ukukweseka ngokunqoba lesicoco: Nginentshisekelo yokuqinisekisa ukuthi izidingo eziyisisekelo zezingane eNingizimu Afrika ziyahlangatshezwa. Ngizokweseka izinhlelo ezizoqinisekisa ukuthi izingane ziyondliwa ngaphambi kwesikole, ngesikhathi nangemva kwesikole. UKgothatso Dithebe waseTshwane uveze ukuthi wavakashela ithuna likagogo wakhe ngesikhathi enza iTop 10 (wayebuye waba kwiTop 10 ngo-2019): Ngifuna ukukujabulela lokhu ngoba ngeke ngiphinde ngiphile kulo mzuzu. Ngibheke ukuthi umphakathi uzwe izwi lami nenhloso yami. Imibono yakhe inanelwe nguCatherine Groenewald waseKapa: Manje sekungokwesithathu ngingena futhi ekugcineni ngidlulele kuTop 10. Ngiyethemba ukuthi lokhu kuzokukhumbuza ukuthi uyakwazi ukwenza okuthile. Ukudalelwa okulibazisekile akusona isiphetho esinqatshelwe.
UDkt Moratwe Masima waseSandton uthe: Bengingalindele ngoba bonke abesifazane ababe kuTop 30 bebemangalisa ngokukhipha ikhono. Lapho ngizwa ukuthi sengifikile ku-Top 10, ngangisanda kuqeda ukusebenza amahora angu-24 esibhedlela. Ngizwe imizwa eminingi ngasikhathi sinye ikakhulu ngoba bengisebenza kanzima ebusuku kodwa futhi ngibonge kakhulu ngokuthi wonke umsebenzi wami onzima ubuzokwaziwa. UKaylan Matthews waseGqeberha ulandise ngomzuzu ohlekisayo phakathi nohambo lweTop 30: Ngaba nengxoxo enomsakazo futhi ngabuzwa ukuthi ngangifunda kusiphi isikole. Ngasizathu simbe, ngikhohlwe igama lesikole sami samabanga aphansi futhi nganika isikole esihluke ngokuphelele ngingaqapheli. Nginesiqiniseko sokuthi ngishiye abaningi engifunda nabo emabangeni aphansi bedidekile ukuthi ngabe babengenwe yini!
ULalela Mswane waKwaSokhulu omele lesi sifundazwe saKwaZulu/Natal, udalula lokho uhambo lukaMiss South Africa olumfundise kona: Okokuqala, ukuthi nginesibindi esithe xaxa kunalokho engake ngazinikeza udumo ngokuba nesibindi ngokwanele sokulandela leli phupho nokuzivulela ithuba lokuhlolwa umphakathi. Okwesibili, ngifundile ukuthi ngiyakwazi ukufeza noma yini engibeka ingqondo nenhliziyo yami futhi okokugcina, ngifunde ukuthi ngiyakwazi ukubhekana kahle nezimo ezinengcindezi ephezulu. UTiffany Francis, waseGoli, ubuze umbuzo onzima kakhulu kuye ngesikhathi sokwahlulela: Ubani umfowenu omthandayo? – umbuzo engithole ukuthi ngingenakuphendula & izingane zakwethu zingifundise ukubaluleka kobudlelwano! UMiss South Africa wethulwa yiWeil Entertainment ngokubambisana neM-Net, Mzansi Magic, neSun International.
