KUZOPHELA ukunethezeka eziteshini zamaphoyisa ekubeni kwenzeka ubugebengu emphakathini, uMnuz Bheki Cele onguNgqongqoshe wamaPhoyisa uthe alikho iphoyisa okumele lingabi nalwazi ngokwenzeka emphakathini elitshalwe kuwo ukuze kuzoba lula ukuthi ekwazi ukunqaba ubugebengu ngokushesha.
Usho kanje ngenkathi amaphoyisa akwaSAPS ethula umkhankaso iBlue Lights Campaign ohlose ukuthi kube namaphoyisa kuzo zonke izinkalo zezwe ngazikhathi zonke. Lo mkhankaso wethulwe ngempelasonto eMaoti Sportsground, eNanda, ngawo kulindeleke ukuthi kuphele ubugebengu obufana nokubulala, ukudlwengula kanye nodlame lobulili. Ngaphambi komcimbi uCele kanye nabaholi bakahulumeni kubo okubalwa noNgqongqoshe woMnyango wokuPhepha nokuXhumana koMphakathi KwaZulu-Natal uNks Peggy Nkonyeni, bahambele ezindaweni ezehlukene ezidlangile ngobugebengu eNanda ukuyoqwashisa ngabo, kufundiswe nomphakathi ngezindlela zokubika ubugebengu. UCele uthe amaphoyisa kumele ewenze ngendlela azoziqhenya ngayo umsebenzi, angenzi engathi enzela umphakathi umusa uma esebenza, kanjalo nomphakathi ngoba ukulwa nobugebengu umsebenzi wawo wonke umuntu. Uthe uma kungaphumelela lokhu kuyoba nokuhlala ngokuthula ngoba ubugebengu buyophela.
Echaza kabanzi ngalolu hlelo, uMkhuzi wamaPhoyisa kuzwelonke uGeneral Khehla Sitole, uthe lugqugquzela ukusebenzisana kwazo zonke izinhlaka zezomthetho nezinye izinhlaka zikahulumeni. Uthe luzoqinisekisa ukuthi zonke izimoto zamaphoyisa zisesimeni, zibe nezimpawu ezikutshengisa kucace ukuthi ziyizimoto zamaphoyisa. “Lolu uhlelo lwethu olokubonakala, olokuba khona kuyo yonke indawo ebusuku nasemini. Sizophinde sisebenzisane nomphakathi ngaphansi kohlelo iCommunity in Blue Concept, kulo sigqugquzela intsha kanye nezinhlaka zomphakathi ukuthi ziqaphe isimo emphakathini. Bonke bazoqeqeshwa ukuze bezokwazi ukuhambisana nomthetho,” kusho uSitole.
UMnuz Prince Mathenjwa onguSihlalo weCommunity Policing Forum Provincial Board, ucele kuCele ukuba kubhekwe ukuthi angaholelwa kanjani amavolontiya alwa nobugebengu emphakathini ngoba yiwo wodwa angatholi ngisho indibilishi ezinhlelweni zikahulumeni ezenzeka ezweni lonke. “Abatholi ngisho imali ye-airtime ukuze bezokwazi ukushayela amaphoyisa uma kwenzeka ubugebengu. Abanye babo sebezinikele ekulweni nobugebengu iminyaka engaphezu kwengu-15. Yibo abenza kube khona inqubekela phambili cishe emacaleni angu-90% abikwa emaphoyiseni,” kusho uMathenjwa.
UMnuz Lungelo Zulu onguSihlalo weYouth Crime Prevention Desk kwisifundazwe, uthe ukubambisana kwazo zonke izinhlaka zikahulumeni kutshengisa ngokusobala ukuthi kuningi okuzofezeka ngalolu hlelo. UNkonyeni uthe uhulumeni wesifundazwe ukujabulele ukuthi lolu hlelo lwethulwe eNanda njengoba isahamba phambili emacaleni okudlwengula nokubulala. “Sithemba ukuthi luzokwenza umehluko emacaleni okudlwengulwa nokubulawa kwezingane kanye nabantu besifazane. Indawo yaseNanda isisixake kakhulu njengoba ihamba phambili ngalamacala izwe lonke. Abesimame abasazizwa bephephile, kuyaphoqa ukuthi kube nomehluko owenzekayo,” kusho uNkonyeni.
