UKUQALA kwesizini entsha yePremier Soccer League (PSL) ka-2022/2023 kulesi sifundazwe kwandulelwe yidili lemidlalo kulesi sifundazwe amaqembu ayithatha njengoyokulungisela isizini entsha.
Kuqale ngemidlalo yePrince Mangosuthu Legacy Cup ebungempelasonto oLundi. Kulomqhudelwano wokuhlonipha umholi we-IFP uMangosuthu Buthelezi ubuhlanganise iMamelodi Sundowns, AmaZulu, iRichards Bay neqembu iZululand Eleven. Lo mqhudelwano uqalwe yiqembu laMaZulu ngo-2017 nokuyiqembu elidala kunawo wonke eNingizimu Afrika njengoba lasungulwa ngo-1932.
Kulempelasonto kaJulayi 30 no-31 kube nemidlalo yeKZN Premier’s Cup ezodonsa lezi zinsuku ezimbili. Imidlalo yangoMgqibelo (Julayi 30) izodlalelwa eKing Zwelethini Stadium, eMlazi, ngaphambi kokuthi owamanqamu ube seHarry Gwala Stadium eMgungundlovu, ngeSonto, Julayi 31.
Akukho mali ezokhokhwa ngamaqembu ukuba yingxenye yalemidlalo ngaphandle kokuthi yiwona azohlumula ngokubamba iqhaza kuyo. UNgqongqoshe wezobuCiko, amaSiko, ezeMidlalo nokuNgcebeleka kulesi sifundazwe, uNks Hlengiwe Mavimbela uthe wonke amakilabhu azohlanganyela azothola u-R625 000.
Lo mqhudelwano uzosebenza njengendlela yokuthi amakilabhu azinze kulesi sifundazwe azitholele ithuba lokuzilolonga okubalulekile ngaphambi kwesizini entsha ezohlanganisa irekhodi lamaqembu amahlanu akulesi sifundazwe aqhwakele esigabeni esiphezulu.
Abadlali bamakilabhu nabo bazobe bethola ithuba lokuzama ukukhombisa abaqeqeshi babo ukuthi kungani kufanele banikezwe isikhathi semidlalo ngethemu ezayo.
Izinkunzi zesifundazwe, iGolden Arrows naMaZulu zidlulela kowandulela owamanqamu kulo mqhudelwano. IRichards Bay FC esanda kufika kuDStv Premiership izobhekana nezikaKhabo Zondo, iRoyal AM emzuliswaneni wokuqala kanti uThongathi oludlala esigabeni sesibili, iPetrice Motsepe luzothola bhekana neMaritzburg United engompetha balomqhudelwano.
Amaqembu amane kwamahlanu akulesi sifundazwe esigabeni esiphezulu abenezinguquko zokuqeqesha ngaphambi kwesizini entsha. UJohn Maduka udlulele obepheka iRoyal AM usejoyine iMaritzburg United, ethatha indawo ka-Ernst Middendorp.
Esikhaleni sikaMaduka iRoyal AM iqashe umakadebona womqeqeshi uZondo. UBrandon Truter uvale ngokusemthethweni isikhala sikaBenni McCarthy njengomqeqeshi waMaZulu ngemuva kokuhola leli qembu isikhashana kulandela ukuxoshwa kwalesilomo seBafana Bafana ekuqaleni konyaka.
IGolden Arrows ikhethe ukulandela ezinyathelweni zompetha beligi iMamelodi Sundowns kanti isiqoke uMabhuti Khanyeza noVusimuzi Vilakazi njengabaqeqeshi. Laba bobabili baphinde bahola Abafana Bes’thende okwesikhashana kulandela ukuxoshwa kukaLehlohonolo Seema ngasekupheleni kwesizini edlule. UPitso Dladla usazoqhubeka nokuhola iRichards Bay esanda kukhuphulela leli qembu njengoba leli qembu libheke ukuvika izembe lisuka esigabeni esiphezulu ngesizini ezayo.
Uhlelo lweKZN Premier’s Cup yalo nyaka lwethulwe eThekwini ezinsukwini ezimbalwa ezedlule . “Lona wumqhudelwano obalulekile owandulela isizini owenziwe ngobuhlakani nomzamo wethu sonke,” kusho uNgqongqoshe wezobuCiko, amaSiko, ezeMidlalo nokuNgcebeleka KwaZulu-Natal uHlengiwe Mavimbela.
“Igalelo lalo mqhudelwano ekusizeni amaqembu ethu ukuthi aqedele amalungiselelo awo ngaphambi kwesizini likhona, sonke sifuna ukulibona. Sifuna ukugcina lesi simo sikhona futhi siqhubeke sithuthuka.”
IGolden Arrows naMaZulu badlulele kuma-semi final. Emidlalweni yomzuliswano wokuqala, iRichards Bay FC esanda kufika kuDStv Premiership izodudulana neRoyal AM kanti Uthongathi lweMotsepe Foundation Championship luzobhekana nompetha bangonyaka odlule iMaritzburg United.
Abaphumelele kule midlalo yangoMgqibelo bazobe sebetholana phezulu ku-semi final ngeSonto. Ama-semi final azodlalwa ngo-09:00 nango-12:00 ngokulandelana. Umnqamulajuqu ungo-16:00.
UNgqongqoshe uphinde waveza ukuthi iqembu ngalinye lizoklonyeliswa ngo-R625 000 njengemali yokungenela umqhudelwano. Kuzongena ezinkundleni zemidlalo mahhala nakubalandeli.
KZN Premier’s Cup:
NgoMgqibelo: Richards Bay FC vs Royal AM (King Zwelithini Stadium, 11:00);
Uthongathi FC vs Maritzburg Utd (King Zwelithini Stadium, 14:00)
NgeSonto: Amaqembu amabili awinile ngoMgqibelo azodlala kuSemi Final yokuqala (Harry Gwala Stadium, 9:00); Lamontville Golden Arrows vs Amazulu FC (Harry Gwala Stadium, 12:00); Owamanqamu (Harry Gwala Stadium, 16:00)
