UKUPHAZAMISEKA kwezinhlelo eziningi ngenxa yokucisha kukagesi okwenzeka ngezikhathi ezithile kuholele ekutheni uNgqongqoshe wezeMfundo kulesifundazwe, UMnuz Kwazi Mshengu, anxuse abakwa-Eskom ukuthi baqinisekise ukuthi abawucishi ugesi ngesikhathi kusabhalwa izivivinyo.
UMnuz Mshengu obephelezele uNdunankulu wesifundazwe uMnuz Sihle Zikalala ngesikhathi evakashele esikoleni eMlazi Commercial High, eMlazi, ngoLwesine olwedlule unxuse abakwa-Eskom ukuthi okungenani baqale baqale ukucisha ugesi ngemuva kwezikhathi zokubhalwa kwezivivinyo. Ukuvakasha kukaNdunankulu bekulandela ukukhathazeka ngokuphazamiseka kwezivivinyo okungenzeka selokhu kwaqala ukusebenza kwesigaba sesibili kuya kwesesithathu sokucishwa kukagesi ngabakwa-Eskom. Yize besatshiswa ngokuthi awekho amalambu ezayo azokwelekelela ukuqhubeka nokubhala kwabafundi izivivinyo, uMshengu uqinisekise ukuthi izikhungo ezingaphezu kwenkulungwane azikaphazanyiswa ukucishwa kukagesi.
Uthe noma yikuphi ukuphazamiseka okuhlonziwe uMnyango ukusingatha ngokushesha. “Kulokhu kuphazamiseka esibe nakho ezinsukwini ezedlule, sikwazile ukungenelela ngale ndlela futhi singasho ukuthi bonke abafundi okungenani bakwazile ukubhala ngesikhathi nokuqeda amaphepha abo ngesikhathi.
“Kodwa siyafisa ukujoyina uNdunankulu ukunxusa imiphakathi ukuthi ihloniphe izivivinyo ukuze ihloniphe ikusasa lezingane zayo, ngoba uma uphazamisa izingane, empeleni uphazamisa ikusasa lazo. Akekho umuntu onelungelo lokuphazamisa izingane ziye esikoleni, okubi nakakhulu ukubhala izivivinyo,”kusho uMshengu.
Lesifundazwe sinabafundi abangaphezu kuka-201 000 abafunda ngokugcwele nabafunda ngesikhathi sabo ababhala izivivinyo zabo okuyisibalo esikhulu sabafundi bakulesi sifundazwe uma siqhathaniswa nesibalo seminyaka eyisithupha edlule.
