UDKT. Nomusa Madlala odume ngelikaMam Siphithiphithi, owaziwa kakhulu ngokuqhakambisa isithunzi sabesifazane uthi ubonga uMdali ngempumelelo ayibonayo ezinhlelweni zakhe ikakhulukazi ekukhuliseni intsha yamantombazane.
UMam Siphithiphithi oshade noDkt. MM Madlala abaphethe ibandla iHouse of Love and Care Ministries International, ePinetown, entshonalanga yeTheku, lokhu ukusho ngesikhathi enengxoxo naleliphephandaba ngemuva kokuthi abantwana ababili abaphume esandleni sakhe ngaphansi kohlelo iDr N Madlala Girl Child Empowerment Programe beqokelwe ku-International Miss Junior South Africa eGoli. Kulomqhudelwano u-Anelisa Ndabankulu benoMpilwenhle Shezi bazobe bemele lesi sifundazwe saKwaZulu-Natal.
UDkt. Madlala unguMsunguli nomphathi weNkampani, iSakha Isizwe Ngomuntu Wesifazane (SINW) esiseze abesifazane abaningi ukubandlondlobalisa emikhakheni ehlukene nokuvukuza amakhono agqibekile kubona okubalwa nawamabhizinisi.
Ngaphandle nje kokubanguMphathi we-SINW okuyinhlangano egabe ngesiqubulo esithi, “Ayiyintsha Lento”, ungumbhali wezincwadi, unguSomabhizinisi, unguMeluleki kwezemishado okuhlanganisa abashadayo nalabo abasuke belungiselela ukungena emshadweni.
UDkt. Madlala odume ngokumenywa emisakazweni ehlukene ubuye abengomunye wabethuli bezinkulumo ezakhayo, afundise ngokubaluleka komshado nomndeni ohlale ubumbene uthokozile, uphethe inhlangano, iGirl Child Empowerment, ekhiqiza uMiss Sakha Isizwe Ngomuntu Wesifazane, uHlelo lwama-Teenagers, olwabashadile besifazane iWomen Empowement, unendawo yokunakekelwa noma ukubhucungwa komzimba.
“Kukho konke okwenzekayo ngibonga uMdali, phezu kokuba izwe like lahlaselwa kakhulu ukhuvethe, kodwa uJehova ubemi nathi, saqhubeka nezinye izinhlelo njengoba sisaqhubeka, okufakazelwa ukuthi kulonyaka kunezingane ezimbili zamantombazane eziyomela isifundazwe ku-International Junior Miss South Africa 2022,”kusho uDkt. Madlala ozigqaja ngokuba nguMrs South Africa Finalist 2019 kanye noTammy Taylor Mrs South Africa.
UDkt. Madlala akagcini nje ngokubakhuthaza kodwa ubuye abambe iqhaza ekumbheleni imiphakathi lapho yena nenhlangano yakhe abuye anikele kwabaswele. Kulonyaka umqhudelwano kaMiss Junior Sakha Isizwe Ngomuntu Wesifazane uyaqhubeka futhi sekufinyelelwe esigabeni sabangu-11 abaqeqeshwayo okulindeleke ukuthi phakathi kwabo kuphume uzime.
Ukubhalisela unyaka ozayo kwabafisa ukungenela lomqhudelwano ithuba selilivuliwe ukuze bakwazi ukuzibekisela esigabeni sokwenza inhlolokho, kanti, itshe lithanda ukugaya ngomunye umhlathi njengoba sekwamukelwa kuze kuyogcinwa ezintokazini ezineminyaka engu-29 ubudala.
Ungumbhali wencwadi “Umakoti Nomamezala”. Ngokusho kwakhe lencwadi wayibhala ngoba ebona izinkinga abantu ababefika nazo kuyena okwakudingeka ukuthi azixazulule ikakhukazi lapho omakoti abancane bekhala ngokuthi bahluhlwa oninazala.
