UMENGAMELI wezwe uMnuz Cyril Ramaphosa uhambele KwaMashu ukuyohlola isimo ngemuva kwezibhelu ezibekhona ngeviki eledlule. UMengameli uhambele leli lokishi ukuyohlola isimo, wafika wakhuluma namalunga omphakathi ngezinkinga ababhekene nazo.
Khonamanjalo amaphoyisa aseMlazi abengena umuzi nomuzi ethungatha impahla yokwebiwa ahambele nasemjondolo eMega Village, ngemuva kwenxanxathela yezitolo iMega City. Naselokishini laKwaMashu amaphoyisa abehambe engena izindawo ezahlukene eqoqa impahla yokwebiwa. Njengoba kwaqubuka izibhelu kulesifundazwe nakwezinye muningi umonakalo owadakela ezitolo abantu bezitapela kuzo izimpahla bhusende. Amaphoyisa asethole inqwaba yempahla yokwebiwa kumalungu omphakathi amaningi. Kulo mkhankaso wamaphoyisa wokuthungatha impahla eyebiwa eMlazi, kuphinde kwaboshwa abesilisa ababili ngaphansi komthetho ka-Section 36, kanti bavele kafushane enkantolo bebhekene naleli cala. Khonamanjalo uNgqongqoshe wamaPhoyisa kuzwelonke uMnuz Bheki Cele uhambele imiphakathi ehlukene lapha KwaZulu-Natal ehlola isimo.
UCele uhambele osomabhizinisi abakhahlamezwe ilesi simo, wahambela inxanxathela yezitolo ezahlukene eThekwini kanye nase Mgungundlovu. UNgqongqoshe uhlangane nabaphathi benxanxathela yezitolo iLiberty Mall eseMgungundlovu, isePavilion kanye nase Gateway eThekwini, ubanikeze izindlela abangazisebenzisa ukuvikela ekutheni babe yizisulu zabatapa impahla, wathi abasebenzisane namaphoyisa kaye nezinkampani zonogada abazimele ukuze bavikeleke. Ngesikhathi sokushicilela eThekwini bekusavulwe izinxanxathela zezitolo ezintathu kuphela njengoba ezinye zakhahlamezeka kakhulu amathuba okusheshe zivule mancane kakhulu. UNgqongqoshe uCele ubambisane nezinkampani zonogada kanye nomphakathi obuveza ukuthi impahla yokwebiwa bangayithola kuphi. Umkhankaso wamaphoyisa wokuthungatha zonke izimpahla ezebiwa uzolokhu uqhubekile kwisifundazwe sonke.
