IMIBUNGAZO yeNyanga yabesiFazane ingene kuvuthondaba izolo njengoba bekuyiHolide lokubahlonipha yendlalelwe yimidlalo yeshashalazi enhlobonhlobo ehlanganisa ne-South African Women’s Arts Festival eqale ngoLwesibili olwedlule neyoze iphele ngoMgqibelo, 13 Agasti, ePlayhouse. Umdlalo weshashalazi osihloko sithi: “Amawethu” omunye wemidlalo obuqinisekisa ukubaluleka kwabantu besifazane neqhaza abalibambile ekugqabulweni kwamaketango obugqila nobandlululo.
NgoLwesihlanu, Agasti 12 kulindeleke ukuthi kube nekhonsathi elididiyele abaculi besifazane, i-Women In Concert, eDrama Theatre kusukela ngo-6 ntambama okuboshelwe kulo izinkakha zabaculi. Phakathi kwabaculi abalindelekile kubalwa u-Ami Faku, uXolile Mncwango, uBerry Trytsman, uXolisa Dlamini, uSiphokazi Jonas obuye abe yimbongi kanye noThando Fuze ukubala abambalwa.
NgoMgqibelo, Agasti 13 osomahlaya besifazane bazokushiya kubuhlungu isisu njengoba kuzobe kune All Women Comedy yona ezoqala ngo-2.30 ntambama. Lokhu kuzokwenzeka nje kuloMgqibelo esiphuma kuwo kade kudingidwa kabanzi ngezindlela zokulwisana nodlame lobulili nokuyisigcawu ebesiqale ngo-12 emini.
ISikhulu esiPhezulu sasePlayhouse, uLinda Bukhosini nobuye abenguMqondisi wezobuCiko kulesi sikhungo sithe, “Eminyakeni edlule, indima yethu ekuqhakambiseni ukubaluleka okukhulu okulethwa abesifazane kuzo zonke izimo zempilo yezwe laseNingizimu Afrika ibe yinto esiziqhenya ngayo”.
“Kulo nyaka, siphinde sakhetha uhlelo lwezethameli zethu ze-SA Women’s Arts Festival oluqhakambisa amandla adonsela phansi, ubuciko kanye nenjabulo abesifazane bethu abanegalelo enhlalakahleni yethu, ikakhulukazi ngomthelela wabo obanzi emasikweni aseNingizimu Afrika,”kusho uLinda Bukhosini.
