SEKUVEZWE izinhlelo ezehlukene zeDurban Tourism ezizobhekelela ukuthi izivakashi ziba nesikhathi esimnandi, ziphephile nokuthi ziphinde zibuye nangonyaka ozayo ukuze iTheku lizoqhubeka libe indawo ehamba phambili kwezokuvakasha kuleli.
Lezi zinhlelo zethulwe iMeya yeTheku uKhansela Mxolisi Kaunda, emcimbini obuse-Octavia Hotel, eNanda, enyakatho yeTheku. Umasipala ulindele ukuthi kufike izivakashi ezicela ku-1 000 000 kwelikabhanana kusukela manje kuze kube umhlaka 16 Januwari.
Kulindelwe ukuthi isibalo sezivakashi ezivela kwamanye amazwe siphindaphindeke kabili kwesango-2021 njengoba sekuvumelekile ukuvakashela kwamanye amazwe. Kubhekwe ukuthi amahhotela abe nabantu abangaphezu kuka-60% wesibalo akwazi ukusimumatha.
Konke lokhu kulindelwe ukuthi kufake imali elinganiselwa ku-R1.2 billion emnothweni wedolobha, kukhiqize imisebenzi engu-2 500. Umasipala uzoheha izivakashi ngokusebenzisa ezobuciko namasiko ngaphansi kwesiuqubulo esithi My City, My Heritage.
UKaunda uthembise nokuthi amabhishi azobe evulelekile, nezinye izindawo ezifana nezindawo zokuthenga, izindawo zokuszivocavoca, ezokudlala izithuthuthu, amapaki kanye namahlathi avikelekile.
“Ezokungcebeleka zasebusuku kanye nezindawo zokudlela zaseThekwini kuseyizo ezihamba phambili kuleli. Kumele siphinde sikhumbule ukuthi sinokunye okwenzeka emabhishi njengokugijima, ukushovwa kwamabhayisikili, nezinye izindawo zokudlela,” kusho uKaunda.
