SILOBE kusaqhubeka ukukhucululwa kweDolobha ngemuva kwezimvula ezinamandla ezigugule umhlaba zabhidliza izindlu, amabhuloho nemigwaqo iThekwini nasemawadini akhele leli dolobha ashayekile ngenxa yalezi zikhukhula. Ngokwezibalo zakamuva umonakalo walezi zikhukhula silobe ulinganiselwa kuR757 million.
UMengameli wezwe, uMnuz Cyril Ramaphosa umemezele lesi sifundazwe njengendawo yenhlekelele ngemuva kokucekeleka phansi kwengqalasizinda ngenxa yezimvula ezihlasele kusukela ngomhla ka-8 kuya ku-11 Ephreli. Isimemezelo senziwe ngemuva kokuthi uMengameli uCyril Ramaphosa evakashele lesi sifundazwe ngomhla ka-13 Ephreli ukuzohlola umonakalo wale nhlekelele eyedlule nemiphefumulo eminingi. UMengameli uRamaphosa uhole ithimba ebelizohlola umonakalo owenzeke eThekwini, okuyilona dolobha elikhahlamezeke kakhulu esifundazweni. Ithimba liphinde lavakashela nemindeni elahlekelwe yizihlobo, okubalwa kuyona nomndeni wakwaSokhela kuwadi 22 olahlekelwe ngamalungu omndeni amane, obekukhona nezingane, ngesikhathi isonto eliseduze liwela emzini wabo.
Ubephelezelwe wuNdunankulu waKwaZulu-Natali uSihle Zikalala, iMeya yeTheku iKhansela uMxolisi Kaunda, ongqongqoshe kuzwelonke nongqongqoshe besifundazwe. Ukwelekelela abantu abasale dengwane, uMasipala usuvule amahholo omphakathi awu-17 okukhosele kuzona abahlali abawu-2 138. Njengamanje, kufinyeleleka ezindaweni zaseThekwini eziwu-60 wamaphesenti ngezithuthi zomphakathi. Kepha, ezinye izindawo ezifana naseMolweni akufinyeleleki kuzona. Onjiniyela bakulezi zindawo ukuyokhuculula baphinde balungise eminye yemizila okubalwa kuyona owaseBayhead owumzila wezomnotho obalulekile kuleli nasezwenikazi. UMnyango wezokuThutha eKZN usuwelekelele ngogandaganda neminye imishini emikhulu ukuze kuphuthunyiswe ukuvulwa kwemigwaqo. Cishe u-95 wamaphesenti wamanzi akuleli Dolobha uphakelwa wuMgeni Water.
Imisele emikhulu emibili ephakela amanzi esikhungweni esikhulukazi sokuphakela amanzi seMgeni Water, iDurban Heights, icekeleke phansi. Lesi sikhungo siphakela u-540 Ml wamanzi njalo ngosuku. Njengamanje, umthamo wehlile wafika ku-350 Ml ngosuku. Ngenxa yalokhu, izindawo eziningi azinawo amanzi. Njengesisombululo sesikhashana, kukhishwe amaloli athutha amanzi futhi iDolobha lisezinhlelweni zokuthola isikhungo sesikhashana sokuhlanza nokuphakela amanzi. Umgeni Water noMnyango wezokuBusa ngokuBambisana neziNdaba zoMdabu bazokwelekelela ngokwengeza amaloli athutha amanzi.Ugesi usubuyile ezindaweni eziningi zeDolobha kanti sezizintathu kuphela izikhungo zikagesi ezingakasebenzi ngenxa yomonakalo omkhulu owenzeke kuzona.
Lezi ziseWentworth, kwaToyota naseProspecton. Ngaphezu kwalokho, kudaleke umonakalo kaR28 million ezikhumulweni ezithile nasezikhungweni zokulahla imfucuza. UNdunankulu uZikalala uthe: “Ukumenyezelwa kwesimo senhlekelele kuzosiza ekutheni kwenziwe izinhlelo zokubhekana nalesi simo ngendlela efanele.” IMeya uKaunda igcizelele ukuthi izikhulu zimatasatasa nokuhlola umonakalo nezindleko zokulungisa ingqalasizinda ecekeleke phansi. “Le nhlekelele iphazamise izinhlelo zomnotho zeDolobha njengoba imigwaqo engenela echwebeni icekeleke phansi kanti nezikhumulo okugcinwa kuzona iziqukathi eningizimu yeTheku nazo zikhahlamezekile. Kudingeka ukuba sisebenze ngokushesha ukulungisa ingqalasizinda elimele nokubuyela sihlinzeke izidingo zomphakathi,” kusho iMeya uKaunda. Ugxeke izigameko zokuzitapela impahla ezenzeke ezindaweni ezifana naseMlazi. Eminye imibiko icashunwe ephephandabeni likaMasipala weTheku.
