UFANISWA tempi kaGaliyathi noDavide umdlalo weDStv Premiership ozokuba phakathi kweRoyal AM ne-Orlando Pirates, Chatsworth Stadium, eChatsworth kusasa, ngoLwesihlanu, ngo-7.30 ebusuku.
Lamaqembu womabili, iThwihli Thwahla nezikaMagebhula azodlala lomdlalo nje alobizela ukuzibeka ethubeni lokungena kuCAF Champions League. Uma kwenzeka lokhu kufezeka kuThwihli Thwahla kuzobe kungumlando, kanti ngakolunye uhlangothi iPirates isazikhotha amanxeba ngokwehlulwa emdlalweni wefayineli yalomqhudelwano.
IPirates ithishwa njengesethubeni lokuphuma endaweni yesibili ngemuva kokunqoba okukhulu ibhekene neMaritzburg iwakhuphulile amathemba ngemuva kokuthi ihlule iMaritzburg United ngo 4-1 emdlalweni weDStv Premiership ngoLwesibili ebusuku e-Orlando Stadium.
Amagoli ePirates ashaywe nguThembinkosi Lorch (ngomzuzu ka-21), obesefomini, Kwame Peprah (42), Deon Hotto (60) noKabelo Dlamini (69) kwathi uLwesihlanu Samu (63) weTeam of Choice wabeka elokubika ekhaya.
IPirates, okusasele imidlalo emibili ukuthi iyidlale okubalwa owakusasa nowangoMsombuluko, ingaqeda endaweni yesibili uma ingayiwina yonke imidlalo esele njengoba izishaya isifuba ngomehluko wamagoli uma iqhathaniswa neCape Town City esendaweni yesibili.
Ngemuva kokugeja iphenathi elahlekisele iBucs ithuba lokuwina isiliva kule sizini kuConfederation Cup ibhekene neRS Berkane ngoLwesihlanu, uLorch udlale njengomuntu obekumele afakazele.
Lo mdlali we-PSL Footballer of the Season ka-2019 ube yingozi kubadlali basemuba beMaritzburg cishe ubusuku bonke futhi ubebandakanyeke emagolini amane ePirates. IPirates iphume ibukeka sengathi ifuna ukuqala ngesivinini, futhi ihlose ukuthola igoli kusenesikhathi.
Umqeqeshi weMaritzburg u-Ernst Middendorp kuyacaca ukuthi akagculisekile ngendlela abadlali bakhe abadlale ngayo njengoba efake abadlali abahlanu ekuqaleni kwesiwombe sesibili.
Lomqeqeshi odabuka eJalimane ulande uZukile Kewuti, Lelethu Skelem, Brandon Theron, Ryan Rae no-Alfred Ndengane kwathi uTawanda Macheke, Genino Palace, Keegan Ritchie, Nicholus Lukhubeni noLucky Baloyi wangababuyisa ngemizuzu engu-45 yokugcina.
Kodwa alukho ushintsho olusheshayo ekwenziweni kweMaritzburg kwazise kube yiPirates eqhubekile nokubusa ekwenze ngesiwombe sokuqala.
AmaBhakabhaka asezodinga ukunqoba lapho ebhekene neRoyal AM eThekwini ngoLwesihlanu neSuperSport United e-Atteridgeville ngoMsombuluko ukuze aphume isibili.
Lamontville Golden Arrows ekhuphule amathemba okukhuphukela endaweni yesishiyagalombili kuDStv Premiership ngemuva kokuhlula izimbangi zaKwaZulu-Natal AmaZulu ngo 2-1 ngoLwesibili ntambama, emdlalweni obuseMoses Mabhida Stadium, eThekwini, ithandazela ukuthi iPirates iwunqobe umdlalo ezowudlala eSuperSport United ngoMsombuluko e-Atteridgeville.
Usuthu lwenze izinguquko ezintathu emdlalweni obumiswe ngempelasonto ngenxa yesimo sezulu ebesingesihle njengoba kwabuyiselwa abadlali basemuva uPhilani Zulu noKgotso Moleko ehambisana no-Andre De Jong.
