KUTHE kuqambe kufika usuku lwangeSonto, Agasti 14 obekuwusuku lokuzalwa kukaPastor Zweli Dlamini indodana kaBishop M Dlamini ongumholi webandla i-Apostolic Faith Mission, KwaSanti ngaseMariannhill entshonalanga yeTheku abazalwane bebe sebebusisekile yizintshumayelo ebezethulwa ngabanye bosondonzima kwezikaLizwi.
Lezi Imvuselelo zeSiyabaletha Conference kulonyaka ebezihlanganisa iminyaka engu-16 zabakhona bezibanjelwe KwaSanti Campus ekhoneni lemigwaqo Isizinda noSiyathuthuka, KwaSanti ngaphansi kwesiqubulo esithi, “A Year Of Greater Glory”. Ziqale ngoMsombuluko owedlule kwaze kwabayiSonto, Agasti 14 nobekuwusuku lokuzalwa kukaPastor Zweli Dlamini.
Phakathi koSondonzima kwezikaLizwi abebededela amabhomu ezintshumayela kubalwa uMphostoli Neo Rathebe, uMphrofethi Sandile Msimanga, uMfu. Mveli Mkhize, uPastor Zamokuhle Biyase, uBishop Sabelo Mdletshe kanye noMphostoli Malusi Dladla.
Kulezi zimvuselelo uhlelo oselukhu zaqalwa luphathwa uPastor Dennis Nzonzo Ntombela oshayela uhlelo olungaconsi phansi kubalaleli boMsakazo iHighway Radio, oluthi, Vulindlela zibonakale zithakaselwa kakhulu ngabazalwane nomphakathi nje wonke owakhele indawo yaseMarianhill namaphethelo kanye nezingxenye ezakhele iPinetown.
Okunye obekwenzeka ukuthi lezi Imvuselelo bezisakazwa nasemsakazweni iHighway Radio njengoba nawo selokhu zasungulwa lezi Imvuselelo ubuyingxenye yezinhlelo zazo. Abagulayo bebephulukiswa. Kusukela ngoMsombuluko kuya kuLwesine bekukhonzwa nje kodwa izinhlelo zishintshile ngoLwesihlanu lapho kuqale khona kwakhonzwa kugqokiswe okwamabhinca, ngoMgqibelo bekungesinye isigaba kwazothi ngeSonto kwadliwa indwangu emhlophe nemnyama.
Lezi zimvuselelo bezilandela umbono kaPastor Zweli Dlamini wokuthi ngaphambi kokuba kufike usuku lwakhe lokuzalwa kubalulekile ukuthi kube nezimvuselelo lapho kuzokhulekelwa khona abantu futhi basindiswe abagulayo, bese belashwa nangezwi LeNkosi.
Ngaphandle kwezintshumayelo nokuphulukiswa kwabagulayo, umculo nawo ubukhona. Phakathi kwabaculi abebephakela ukudla kwendlebe kubalwa iqembu Abadumiso, uNtokozo Ngongoma kanye noPhilani Mbambo.
