ISIZINI entsha yePremier Soccer League (PSL) iqale ngegiya eliphezulu lapho abadlali bamaqembu ahlukene agijima ezigabeni ezingaphansi kwePSL kubandakanya nesigaba seDStv Premiership ekhombise omkhulu umfutho.
Ngaphandle kokukhombisa umdlandla kubadlali, njengoba lesizini ivulwe ngoLwesihlanu olwedlule, kodwa kwabanye babalandeli bezwakalise ukunengeka ngendlela amaqembu abawalandelayo ayiqale ngayo isizini ka-2022/2023 ephenduka ukudla kwamaqembu.
I-Orlando Pirates iwuqale kahle umkhankaso wayo we-DStv Premiership ngoMgqibelo ntambama ngesikhathi ibhxabula omkhaya bayo iSwallows ngo-1-0 emdlaweni obus-Orlando Stadium.
IRichards Bay iqale umdlalo wayo wokuqala kuDStv Premiership ngokwehlula iGolden Arrows ngo 2-0 emdlalweni obusePrincess Magogo Stadium ngoMgqibelo ntambama.
INatal Rich Boyz, edle umhlanganiso kwiGladAfrica Championship ngesizini edlule, iwine lomdlalo ngamagoli ashaywe uSomila Ntsundwana no-Abel Mabaso.
IRoyal AM ibuye yakhombisa amandla ayo kuKaizer Chiefs ngesikhathi iyihlula ngo 1-0 ngoMgqibelo kusihlwa eChatsworth Stadium. Ukunqoba kukaThwihli Thwahla kusho ukuthi Amakhosi seyiwashaye imidlalo emithathu kuDStv Premiership.
AmaZulu aqale umkhankaso wawo ka-2022/2023 ngokubhekana neqembu elithuthuke kakhulu iTS Galaxy lapho lamaqembu etholane phezulu eBidvest Stadium ngeSonto ngo-3 ntambama yabangakhona evuma ukugoba uphondo, umdlalo waphela ngo-0-0.
IMaritzburg United neSekhukhune United badlale ngokulingana ngo 1-1 emdlalweni wabo wokuvula weDStv Premiership ngoMgqibelo ebusuku eHarry Gwala Stadium, eMgungundlovu.
Namuhla kulindeleke ukuthi kuqhebeke nokuba nguwafa wafa ezinkundleni ezahlukene njengoba amanye amaqembu athole isabhaxu kulindeleke ukuthi abhodlele kwamanye.
Phakathi kwemidlalo elindelekile ngozkuba phakathi kwamaZulu FC neSuperSport United. Lomdlalo uzoba seMoses Mabhida Stadium, eThekwini, ngo-5 ntambama. ISekhukhune United izodudulana neGolden Arrows ePeter Mokaba Stadium, ePolokwane, ngo-7.30 ebusuku, nawo lomdlalo uzokuba namuhla.
Omunye umdlalo obhekwe ngabomvu namuhla ngozokuba phakathi kweChippa United neRoyal AM, eNelson Mandela Bay, ePort Elizabeth, ngo-7.30. IMamelodi Sundowns izotholana phezulu neTS Galaxy, eLoftus Versfeld Stadium, ePitoli, ngo-7.30 ebusuku.
NgoLwesihlanu iMaritzburg Utd izodududulana neSwallows eHarry Gwala Stadium, eMgungundlovu, ngo-7.30 ebusuku. NgoMgqibelo kulindeleke ukuthi kube nguwafa wafa phakathi kweMamelodi Sundowns neKaizer Chiefs, Loftus Versfeld Stadium, ePitoli, ngo-3 ntambama.
Ngawo uMgqibelo iMarumo Gallants FC kulindeleke yamukele iGolden Arrows ePeter Mokaba Stadium, ePolokwane. Lomdlalo uzoba ngo-3 ntambama, iStellenbosch sizodudulana neRoyal AM eDanie Craven Stadium, eStellenbosch, ngesikhathi esifanayo.
I-Richards Bay izokwamukela iSekhukhune United eKing Zwelithini Stadium, eMlazi, ngo-5.30 ntambama. AmaZulu kulindeleke ukuthi adudulane neCape Town City, eMoses Mabhida Stadium, eThekwini, ngo-3 ntambama yonke lemidlalo izokuba ngoMgqibelo bese kuthi ngeSonto i-Orlando Pirates abhaxabulane neChippa United, e-Orlando Stadium, ngo-3 ntambama, eOrlando Stadium, eSoweto.
