IZITSHUDENI zaseDurban University of Technology (DUT) zinqumele abaphathi balesi sikhungo ugwayi kati wokuthi uma lishona elanamuhla zingazitholanga izimpendulo eziqondile zizoqhubeka nemibhikisho.
Lokhu zikuzwakalise ngoLwesihlanu ngesikhathi zinemashi ebihlelwe wophiko lukazwelonke lwenhlangano yabafundi edlalena ne-EFF, i-EFF Student Command, ebisuka enkundleni yezemidlalo eCurries Fountain, eThekwini, obekuhloswe ngayo ukuhambisa uhla lwezikhalo kubaphathi besikhungo. Izitshudeni zifuna isixazululo ngodaba lukanogada osolwa ngokudubula, abulale uMlungisi Madonsela (20) ngenkathi
kunombhikisho ophikweni lwaseSteve Biko ngoFebhruwari wango-2019, zithi zifuna ubulungiswa okanye zizokwenza kungahlaleki kule nyuvesi. Lokhu kuvuka umbhejazane kwezitshudeni zifune izimpendulo ezisheshayo kuqhamuke ngemuva kokuthi iNational Prosecuting Authority (NPA) yathatha isinqumo sokuthi ngeke ikushushise ukubulawa kukaMadonsela. Izitshudeni zithi inyuvesi ayikwazi ukuluziba lolu daba njengeNPA ngoba uMadonsela wayeyisitshudeni saseDUT. Zikhala ngokuthi lokhu kuthumela isithombe esibi sokungaphephi kwezitshudeni kuyo le nyuvesi.
Kule mashi ebilibangise ophikweni lwaseSteve Biko izitshudeni bezihambise izikhalo zazo kubaphathi besikhungo. Kokunye kwebezikhala ngakho ziphakamise ukuthi uFebhruwari 5 kube yiholidi kule nyuvesi, kuqanjwe nesakhiwo esisha ngoMadonsela njengendlela yokumhlonipha. Umqulu wezikhalo zezitshudeni umukelwe uDkt Maditsane Nsumpa Nkonoane owengamele izitshudeni kule nyuvesi. IDUT ibingakasho lutho ngohlu lwezikhalo eluthole kwizitshudeni, kulindeleke ukuthi iziphendule namhlanje. Izitshudeni zisabise ngokuthi zizoqhubeka nokubhikishela inyuvesi uma ingenzeki intando yazo. UMadonsela wayenza unyaka wesithathu weBusiness Administration.
