OSOMABHIZINISI abancane besifazane bathole ithuba lokwakha ubudlelwane nabanye osomabhizinisi, nelokufunda kabanzi ngezamabhizinisi ngenkathi kuneDurban Business Fair: Women Economic Empowerment ebise-Inkosi Albert Luthuli International Convention Centre (ICC) muva nje.
Ngenxa yemigomo yomvalelandlini, le ngqungquthela ibivuleleke kubantu abangu-100 kanye nosomabhizinisi abangu-10 kuphela. Obekwenzeka kufakwe nasezinkundleni zokuxhumana, kwavulela ithuba nabanye abalinganiselwa ku-1 000 ukuba behlomule kuzo zonke izinhlelo ebezenzeka ngosuku lwengqungquthela. UNks Nasiphi Ngwane onguMsunguli weHair Native Studio and Laloba Organics ekhiqiza izimonyo namakhemikhali okuhlanza izinwele, uthe ukufika kweCoronavirus kuphazamise izinhlelo zosomabhizinisi abancane abaningi. Ubonge kuMasipala weTheku ngokubahlinzeka ngethuba lokukhangisa ngemikhiqizo yabo.
Kwabebehlomisa osomabhizinisi ngolwazi abaludingayo kubalwa uNks Zibu Masotobe oyiSikhulu esiPhezulu seZoluhle Financial Fitness okhuthaze osomabhizinisi ukuba bethengise imikhiqizo exazulula izinkinga ezikhungethe umphakathi, uNks Ntsiki Biyela we-Aslina Wines othe kumele bezifundise ukwedlulisa uma kukhona okungahambanga kahle. UDk Ziphozenkosi Nzimande noDkt Nokubonga Khoza bagcizelele ukubaluleka kokuzinakekela ngokwezempilo nokubukeka kahle. UNzimande uphinde wakhuthaza osomabhizinisi ukuba bevulele abanye osomabhizinisi besifazane ithuba, bethole nezindlela zokusebenzisana nabo.
UNks Nonku Mthembu oyiPhini leNhloko yoPhiko lokuThuthukiswa kwamaBhizinisi amaNcane kumasipala, uthe osomabhizinisi abathole ithuba lokukhangisa ngamabhizinisi nemikhiqizo yabo baqokwe ohlwini losomabhizinisi abayingxenye yezinhlelo zeDurban Business Fair. “Siphe bonke abebeyingxenye yengqungquthela amavawusha ka-R150 ukuze bezoxhasa osomabhizinisi abebekhangisa ngokuthenga imikhiqizo yabo. Bathole amakhasimende amasha, futhi imali abayitholile bazoyisebenzisela ukudlondlobalisa amabhizinisi wabo,” kusho uMthembu. Uveze ukuthi kuqokwe osomabhizinisi abangakaze behlomule ezinhlelweni zikamasipala ngaphambilini, futhi bekumele kube osomabhizinisi abanemikhiqizo edingeka kakhulu. “Inhloso yethu njengomasipala ukuhlinzeka osomabhizinisi ngendawo enhle yokusebenza, sibeseke nangabakudingayo,” kusho uMthembu.
