KUBUKEKA kuzoba yisizini ezinza le ezoqalwa yePremier Soccer League (PSL) ka-2022/2023 njengoba amanye amaqembu akhombise ngendlela asayinise ngayo abadlali futhi aphinde abanekhefu elifushane.
Phakathi kwamaqembu obekubhekwe lukhulu kuwo ngabadlali azobasayinisa kubalwa AmaZulu FC ethuse abaningi ediliza abadlali abangu-15, kube yiKaizer Chiefs, yiMaritzburg United, yi-Orlando Pirates nokuyiwona maqembu asephumele obala ngokusayinisa abadlali nabakhululile ukuthi bayojoyina amaqembu abawathandayo ngokuphela kwalenyanga uJuni, 2022.
Ngemuva kokuthi iKaizer Chiefs imemezele abadlali bayo abasha ngoMsombuluko, leli qembu liphinde laqinisekisa ubude benkontileka yomdlali ngamunye. Amakhosi okulindeleke ukuthi amemezele ukuthi asayinise uYusuf Maart kuSekhukhune United, aqinisekise ukuthi kufike uDillon Solomons, Kamohelo Mahlatsi, George Matlou, Siyethemba Sithebe, Ashley du Preez noZitha Kwinika, kanti umdlali weDStv Diski Challenge uMduduzi Shabalala, naye usejoyine isikwati esikhulu.
UDillon Solomons, usayiniswe esuka kuSwallows, usayine inkontileka yeminyaka emine nalezi zinkunzi zaseSoweto. Inkontileka yakhe izomgcina kuleli qembu kuze kube yilapho eneminyaka engu-30 ubudala.
UKamohelo Mahlatsi ungomunye othengwe kwiZinyoni zaseDube, uMahlatsi (23) unikezwe inkontileka kuze kube ngu-2025.UGeorge Matlou, Amakhosi akuqinisekisile ukuthi lo mdlali wasesiswini usayine inkontileka yeminyaka emibili ezomgcina kuleli qembu kuze kube u-2024. Lo mdlali (23) inkontileka yakhe iyamvumela ukuthi angayelula ngomunye unyaka. USiyethemba Sithebe, ukufudukela kwakhe kuMakhosi kugcine kwenzekile ngemuva kokulinda izinyanga eziningi. Usayine inkontileka yeminyaka emibili, ezomgcina kuleli qembu kuze kube uJuni 2024.
UZitha Zwinika ubuyela eNaturena ngemuva kokuvela ezinhlakeni zezikwati ezincane zekilabhu. Lo mdlali wasemuva usayine inkontileka yeminyaka emithathu ngemuva kokuhlala ngempumelelo kuStellenbosch FC. U-Ashley Du Preez, yena umdlali ogijima phambili usayine inkontileka yeminyaka emithathu nezinkunzi zaseSoweto, efana nozakwabo wakudala weqembu leStellies, uKhwinika. UMduduzi Shabalala ubengumkhiqizo wokuthuthukisa, obelokhu engqongqoza emnyango weqembu elikhulu, uklonyeliswe ngenkontileka yeminyaka emithathu.
Ngasohlangothini le-Orlando Pirates silobe kusayiniswe abadlali abane, kwachithwa abayisithupha. Leliqembu laseParktown, ngoMsombuluko liqinisekise ukuthi lisayinise abadlali abane abasha u-Evidence Makgopa, Eva Nga, Miguel Timm no-Azola Matrose.
Laba badlali kulindeleke ukuthi babe yingxenye yezinhlelo zekilabhu zangaphambi kwesizini njengoba kuqinisekiswe esitatimendeni esisemthethweni. Ngaphezu kwalokho, leli qembu likuqinisekisile ukuthi kunabanye abadlali abayisithupha abalandele uThulani Hlatshwayo ngomnyango wokuphuma eqenjini.
IPirates isimemezele ngokushiya kukaJustice Chabalala, Wayne Sandilands, Thabang Monare, Elson Sithole, Kwanda Mngonyama no-Abel Mabaso. Ngokwesitatimende seqembu, ziphelile izingxoxo ngenkontileka entsha kaMonare, kanti kusaqhubeka izingxoxo zokubophela uSandilands endimeni ehlukile eqenjini.
AmaZulu awine umbango womdlali wasesiswini weTS Galaxy uMichael Madyira. Lo mdlali oneminyaka engu-20 ubudala kubikwa ukuthi ugaqelwe ngaMakhosi asakha kabusha ngaphansi komqeqeshi omusha u-Arthur Zwane. U-Ethan Brooks usephothulile ukufudukela kuMaZulu esuka kuTS Galaxy egijima kuPremier Soccer League.
Lo mdlali odlala esiswini usesayinile kuMaZulu njengoba kunemibiko edlule yokuthi iChiefs ibimfuna. Imininingwane yenkontileka kaBrooks ibingakadalulwa kodwa Usuthu luqinisekisile ukuthi lubambe lo mdlali ngomlomo womqondisi weqembu uManzini Zungu.
“Angikwazi ukulinda Usuthu ndawonye ngesizini ezayo,” kubhala uZungu enkundleni yezokuxhumana ngesikhathi uBrooks ebhala phansi nosihlalo waMaZulu, uSandile Zungu.
Usuthu lusayinise lo mdlali okubikwa ukuthi usendleleni ebheke eNaturena. UBrooks ujoyine leli qembu ngemuva kwamasizini amathathu neTS Galaxy okuhlanganisa amabili awo edlala ibhola elisezingeni eliphezulu.
Udlale imidlalo engu-25 yePSL ngesizini edlule, eqale engu-18 waphinde wadlala emidlalweni emibili yeNedbank Cup. Ujoyine iqembu laMaZulu elisayinise uDumisani Zuma obekwiKaizer Chiefs noFrank Mhango we-Orlando Pirates. U-Augustine Kwem, Thendo Mukumela neChippa United kaVeluyeke Zulu noRiaan Hanamub kubikwa ukuthi basendleleni ebheke Usuthu. Ukusayiniswa koSuthu kuza ngemuva kokuthi abadlali abangu-15 besanda kukhishwa kuleli qembu.
