IZINDAWO eziningi eThekwini zisale dengwane zingenawo ugesi ngemuva kokuqhuma kwesiteshi esikhulu esiphakela ugesi saseKlaarwater ngoLwesibili ebusuku.
Lokhu kuqhuma okucishe kwadala omkhulu umonakalo kuzaphamise ukusebenza kukagesi ezindaweni eziseningizimu yeTheku, entshonalanga yeTheku kanye nasenyakatho yedolobha kuhlanganisa nezingxenye ezingaphakathi edolobheni. Ngesikhathi sokuloba loludaba izolo ngoLwesithathu kwezinye izindawo ugesi ubusubuyile. Phakathi kwezindawo kubalwa iClermont, KwaDabeka, eMalvern, eHillcrest, eClare estate, eReservoir hills, ePinetown, eHillary, eWestville, eShallcross, eCato Manor, e-Asherville, eHillary, eMbilo, eClairwood, eJacobs, eBayhead, eMaydon Wharf, Effingham, eRedhill, e-Avoca kanye neGlenwood. Ama-video amaningi abezungeza ezinkundleni zokuxhumana ekhombisa ngesikhathi kwenzeka lokhu kuqhuma.
Okhulumela uMasipala weTheku, uMnuz Msawakhe Mayisela, uthe ochwepheshe bayaphenya ngalesi sigameko. “Ukuqhuma kwesiteshi esikhulu esingu-275kv Klaarwater kubangele ukunqamuka kukagesi okusabalele cishe ku-50% wezindawo ezisenyakatho, entshonalanga naseningizimu yedolobha. Lezi zindawo azinagesi. Isiteshi siyindawo ebalulekile yokuphakela ugesi ukusuka kwa-Eskom ukuya edolobheni. Izindawo eziningi ezikhahlamezekile kulokhu kunqanyulwa kukagesi sizowazisa umphakathi ngenqubekela phambili,” usho kanje.
