KULINDELEKE ukuthi uMasipala weTheku ugcine usivalile isikhundla sikaSihlalo wekomiti le-Municipal Public Accounts Committee (MPAC) njengoba sekuphele izinyanga ezine singenamuntu, kulandela ukuxoshwa kukaDkt Makhosi Khoza yi-ActionSA.
USomlomo kamasipala uThabani Nyawose utshele iphephandaba lesingisi lansuku zonke ngoLwesine olwedlule ukuthi usihlalo uzokhethwa emhlanganweni womkhandlu ekupheleni kukaJulayi.
I-DA namanye amaqembu bebefuna kuvalwe lesi sikhundla, nokuyinto uSotswebhu we-DA, uMnuz Thabani Mthethwa, ephinde wayiphakamisa noSomlomo emhlanganweni wakamuva wosotswebhu. UMthethwa naye uthe uthole impendulo efanayo kuSomlomo ngesikhathi ebuza ngokugcwaliswa kwesikhundla. Uthe iqembu lakhe lizokhipha ozongenela lo msebenzi.
UMnuz Mdu Nkosi we-IFP, oweseka omele i-DA, uMnuz Andre Beetge, kulesi sikhundla sokuba ngumfelandawonye, uthe igama lalowo ozongenela ukhetho kuzoxoxwa ngalo ngasekupheleni kwenyanga, wathi kusesekuseni kakhulu ukuthi kukhulunywe ngalolu daba.
Ngasohlangothini, amaqembu amancane athe afuna ukusigcina lesi sikhundla ngokwesivumelwano abasenze ne-ANC ngesikhathi igcotshwa, lapho amaqembu amancane angu-16 avuma ukuyisiza ukuze igcine amandla.
Ikhansela le-NFP, uNkk Zandile Myeni, uthe bafuna ukusigcina lesi sikhundla njengengxenye yesivumelwano sombimbi, wathi izingxoxo zisazoqhubeka maduze mayelana nalolu daba.
UMyeni uthe ngokwesivumelwano sombimbi, i-ANC bekumele inikeze amaqembu amancane isikhundla sokuba yiPhini leMeya, isihlalo esigungwini esiphezulu, uSihlalo wekomiti le-Ethics Committee kanjalo neMPAC – konke okuyihloniphayo – ngaphandle kwekomiti lezokuziphatha, okuyilona elihoxile yanika elinye lamakhansela ayo.
Ekomitini elinamalungu angu-11, i-ANC inamahlanu, iDA 3, IFP 1, EFF 1 ne-ActionSA 1. Ngokomgomo kamasipala, usihlalo weMPAC kumele akhethwe ngaphakathi ekomitini, kodwa ngevoti lomkhandlu eligcwele.
Lesi sikhundla sivuleke ngemuva kokuthi i-ActionSA ixoshe uKhoza. Ukuqokwa kwakhe kulesi sikhundla nosekwasekwa yi-ANC kusimangaze kwazise iqembu lakhe liseqenjini eliholwa yi-DA. Lokhu kwamcasula kakhulu umphathi we-ActionSA, uHerman Mashaba, wabe esekhishwa esikhundleni sokuba yikhansela nelungu leqembu.
Ukwamukela kukaKhoza ukwesekwa kwe-ANC kulesi sikhundla kuqubule imibuzo yokuthi ngabe wayivotela yini le nhlangano ngesikhathi egcotshwa, lapho uNicole Graham we-DA ehlulwe khona kwesobumeya kuMxolisi Kaunda.
Njengoba uKhoza eshiye ikomiti kanye nobudlelwano obubi be-ActionSA ne-ANC, mancane amathuba okuthi usihlalo omusha aphinde aqhamuke ku-ActionSA.
UMyeni uthe le nhlangano izohlangana bese idlulisela igama lalowo ozongenela ukhetho kwi-ANC, kodwa lokho kuzosho ukuthi le nhlangano kumele idele ikhansela elilodwa ukuze kuhlaliswe amaqembu amancane.
USotswebhu kulo masipala, uMnuz Thembo Ntuli, oyibamba likaSihlalo we-ANC esifundeni kwathi uNkk Zandile Gumede kwadingeka ukuthi ahoxe, uke wathi ukuxoxisana namadlelandawonye kusaqhubeka ngezinto ezahlukene, kodwa wathi njengabo bonke ubudlelwano, izinkinga ziyohlezi zivela futhi. kuxazululwe.
