AMANYE amalungu amabili e-ANC, okuhlanganisa nekhansela, avele eNkantolo yeMantshi yaseNtuzuma ngoLwesine olwedlule mayelana nesigameko sokudubula okwashona kuso amalungu amathathu enhlangano, ngoSepthemba 11, ngonyaka odlule.
Ikhansela laku-ward 54 eThekwini, uKhansela Themba Mnguni noNobhala walo unoMthandazo Mbeje yibona abangabasolwa bakamuva abavele ngecala lokudubula uNksz Ncami Shange (34), uNkk Beatrice Nzama (60) noNkk Philisiwe Jili (37). Laba baboshwe ngoLwesithathu olwedlule. Bajoyine amalungu amane esigungu esiphezulu segatsha le-ANC ku-ward 54 okunguSibongile Buthelezi, Samke Maphumulo, Doctor Lundy noThembinkosi Zakes Mkhwanazi bona ababoshwa ngoNovemba nyakenye. Bonke abasolwa abayisithupha babhekene namacala amathathu okubulala, amahlanu okuzama ukubulala nelilodwa lokwakha itulo lokudala udlame emphakathini.
NgoSepthemba 11 laba besifazane abathathu kuthiwa badutshulwa babulawa ngesikhathi abagibeli abayisihlanu ababesemotweni yohlobo lwe-Opel Corsa bevulela ngenhlamvu ngesikhathi kwakunomhlangano wamagatsha e-ANC, obekumele kukhethwe ozongenela ukhetho emkhandlwini. Lomhlangano wawungaphandle kwesikole iBuhlebethu Primary, emgwaqeni uSithole eNanda, eNewtown C. Okungenani abanye abahlanu balimela baphuthunyiswa esibhedlela. Icala lihlehliselwe uLwesihlanu, Febhuwari 11 ukuze bafake isicelo sebheyili kanti bonke abasolwa basagqunywe esitokisini. Ukuboshwa kwalaba kulandela ngemuva kosuku ungqongqoshe wamaphoyisa uMnuz Bheki Cele ememezele ukuthi ithimba eliphenya ngokubulawa kosopolitiki esifundazweni selivule amadokodo amasha angu-32 kusukela ngoJuni nyakenye – iningi lawo abikwa ngaphambi, phakathi nangemuva kokhetho lohulumeni basekhaya ngoNovemba.
