UNGQONGQOSHE woMnyango wokuHlaliswa kwaBantu neMisebenzi yoMphakathi KwaZulu-Natal, uMnuz Jomo Sibiya, usexolise kwizakhamuzi ezihlala kolindela baseSiphingo, eningizimu yeTheku, ngokungaphothulwa kohlelo lokuzakhela izindlu ngesikhathi.
Uthembise ukuthi umnyango ngaphansi kobuholi bakhe uzosebenza ngokuzikhandla ukuqinisekisa ukuthi kuyaphothulwa ukwakha lezi zindlu ukuze zizosheshe zizithole. Usho lokhu ngenkathi ekade eyohlola ukuthi ukwakhiwa kwazo sekuhambe kwafinyelela kuphi.
Lezi zakhamuzi zazithuthelwe kule ndawo ngenkathi kulungiselelwa iFifa World Cup yango-2010. Kwakuyimndeni engu-780, manje sekusele imndeni engu-360 engakazitholi izindlu. Imndeni emningi isiyatholelwa izindlu eCornubia Integrated Residential
Development. USibiya uthembise ukuthi zonke izakhamuzi ziyobe sezizitholile izindlu zazo esikhathini esingangezinyanga eziyishumi ukuze zizohlala ezindaweni ezihloniphekile nezinazo zonke izidingongqangi. Zizothuthelwa eKonka Road Housing Project ebude buduze nale ndawo.
“Ngithanda ukuxolisa emphakathini ngezinkinga ezenzeka ezaholela ekutheni uhlelo luhambe kancane. Kukhona okwaba ubudedengu babantu, okunye kwakuyizinkinga esasingeke sikwazi ukuzibalekela,” kusho uSibiya.
Uveze ukuthi le ndawo abazothuthelwa kuzo idle imali elinganiselwa ku-R70 million, kuyo kuzotholakala konke izakhamuzi ebezingenakho kolindela njengamanzi ahlanzekile nasezingeni, ugesi, izinhlelo zenhlanzeko nokunye. Ube esexwayisa izakhamuzi ngokuthi zingalokothi zithengise izindlu ezizakhelwa uhulumeni, uma sezithola amatayitela kumele ziwavikele njengezikhali zaMaNtungwa ukuze izigilamkhuba zingeke zithengise izindlu zazo ngaphandle kwemvume yazo.
Abahlali bakule ndawo batshengise ukungakwamukeli okushiwo uSibiya, bathi sebekhulume ngezinkinga zabo baze bashelwa izwi kodwa izikhalo zabo aziphendulwa. Bathi bakubona kunzima ukuthi okuthenjiswe uSibiya kuzofezeka.
UNks Senamile Zulu owayehlala kwa-D eMlazi lapho basuswa khona ukuze kuzokwakhiwa ingqalasizinda yokupaka izimoyo eKing Zwelithini Stadium ngo-2009, uthe usebambe umoya ngesethembiso sikaSibiya.
“Izikhulu zikahulumeni zifika zishintshane kodwa kuyafana, sisaphila njengezingulube. Sizomnika uSibiya ithuba lokuzibonakalisa, uma kungaphumeleli kuzoba sobala ukuthi bonke osopolitiki bayafana,” kusho uZulu.
