UKUNTULA kwezinsiza, ukuntula kwemisebenzi, ukugqoza kwentuthuko, kanye nokushoda kwezinhlelo zokuthuthukisa umphakathi sekuvezwe njengomsusa wokuqubuka kodlame phakathi kwabakuleli kanye nabokufika.
Lokhu kuveze ngenkathi kunomhlangano wokwethula ngokusemthethweni iMigration Project. Umhlangano ubuse-Elangeni Hotel, enkabeni yedolobha muva nje. Kulolu hlelo kuzohlanganyela iDemocracy Development Programme (DDP), i-Adenauer-Stiftung (KAS), kanye ne-European Union (EU). Abaholi balolu hlelo bathi bakholwa ukuthi kumele kube nendlela yokuhlanganisa izakhamuzi zakuleli nabokufika ukuze kuzoboniswana ngendlela okuzophiliswana ngayo. UNks Lily Hlophe onguMqondisi wohlelo kwiDDP, uthe ucwaningo abalwenzile lubatshengise ukuthi luyanda uqhekeko phakathi kwabokufika nezakhamuzi zakuleli.
“Ucwaningo lwenziwe emalokishini amahlanu okunguMlazi, iKwaMashu, iKwaMakhutha, iseSphingo kanye naseSydenham. Sikhethe izindawo ezinabokufika abaningi, kuzo esithole ukuthi banaingi bavela kwelaseCongo, Burundi, kanye nakwelaseNigeria. Sithole ukuthi baningi abakuleli ngokungemthetho abazozama impilo engcono,” kusho uHlophe. Uthe ucwaningo luveze ukuthi abokufika bahola imali elinganiselwa ku-R3 500 ngenyanga, ingxenye enkulu yabo isebenza ezitolo ezithengisa ugwayi, izindawo zokucwala izinwele, kanye nezithengisa izimpahla zokugqoka. “Iningi labo alihlangani nabasebenzi bakahulumeni, ngaphandle uma beyokhokhela ama-rates, ugesi, noma amanzi,” kuqhuba uHlophe.
Uthe abaningi baphenduka izisulu zobugebengu, bengakwazi nokuyobika emaphoyiseni ngoba bakuleli ngokungemthetho. Uthe kubo kukhona nabacwaswa ngokobuhlanga, izigebengu zihlasele izitolo zabo ngoba zihlose ukweba impahla abayithengisayo. Uthe nakuba bekhona abangabafuni abokufika, kodwa baningi asebebamukele. UMbhishobhi Rubin Phillip onguSekela Sihlalo weSocial Cohesion and Moral Regeneration Council (SCMRC), uthe abokufika bazibona njengabantu okungamele bebe kuleli. “Bashiye amakhaya ngenhloso yokuthola impilo engcono kodwa bakhishwa inyumbazana kuleli. Kuyangidumaza ukusho ukuthi akukho esikwenzile ukuguqula lokhu,” kusho uPhillip. Uthe kumele kuphasiswe imithetho emisha ezophoqa ukuthi kwamukelwe abokufika. Uthe kuyadumaza ukuthi izakhamuzi zakuleli zicaswa ezivela kwamanye amazwe. Uthe ngaphandle kokuhlaselwa kwabo, kuphinde kwakhe izilonda engqondweni okuzoba nzima ukuzipholisa.
