WONKE amehlo asethe njo ekutheni ubani okuzoqedwa ngaye ukuqagela ngomqeqeshi ozovala isikhala esivuleke ngemuva kokushiya kukaJohn Maduka ku-Royal AM wajoyina iMaritzburg United.
Ngokwemibiko yabezindaba phakathi kwabaq eqeshi okuqagulwa ukuthi omunye wabo angase azithole eqhwakele esihlalweni sokuqeqesha kwezikaShawn Mpisane no-Andile Mpisane kuvela negama lowayeyiphini lomqeqeshi we-Al Ahly, uCavin Johnson. Kunezinsolo zokuthi uyena ohola umbango wokuthatha isikhundla somqeqeshi okulindeleke ukuthi kuqambe kuqala isizini sibe sesivaliwe.
Emuva kokushiya kukaJohn Maduka, osebambe isikhundla somqeqeshi kuMaritzburg United, kunenqwaba yamagama engakacaci mayelana nokuthi ngubani ozohola leli qembu kulesi sifundazwe esigabeni esilandelayo.
Ngasekuqaleni kwenyanga, eminye yemithombo yezindaba ibike ukuthi uJohnson, uGavin Hunt noDan Malesela amagama abo yiwona abehamba phambili ngokufudukela kuThwihli Thwahla. Kodwa muva nje imithombo ethembekile idalule ukuthi uJohnson nguyena ohamba phambili ekutholeni umsebenzi.
Lo mqeqeshi oneminyaka engu-63 ubudala akakaze azihlanganise selokhu ahlukana noPitso Mosimane ne-Al Ahly ngo-Okthoba nyakenye, kulandela ukudlala ngempumelelo eCairo egcwele izindebe. Selokhu ebuyile kuleli uJohnson ubemataniswa neKaizer Chiefs ne-Orlando Pirates nakuba kungenzeki lutho.
Ngaphezu kwalokho igama lalo mqeqeshi owake waqeqesha AmaZulu neBlack Leopards lafakwa eringini emkhankasweni weSuperSport United wokuthola umqeqeshi ozoqeqesha leli qembu ngokugcwele.
Manje kuzobonakala ukuthi umnikazi weThwihli Thwahla uShauwn Mkhize uyanquma yini ukuqoka uJohnson onesipiliyoni njengomqeqeshi omusha weqembu noma uma ethatha enye indlela emasontweni ezayo.
Sisekuzo kwezabaqeqeshi, i-Orlando Pirates imemezele ukuthi iyakuthokozela ukuqokwa kuka-José Riveiro esikhundleni sokuba uMqeqeshi Omkhulu. URiveiro ujoyine iPirates ngenkontileka yeminyaka emithathu.
“Okokuqala ngithanda ukubingelela bonke abalandeli be-Orlando Pirates. Ngijabule ngokujoyina iklabhu. Uhlelo lwePirates lujabulisa kakhulu futhi ngibheke ngabomvu lokho okusazokwenzeka. Kuyilungelo kimina nozakwethu ukuba nesibopho sokuqeqesha isikhungo esifana nalesi,”kusho uRoveiro.
